जळगाव, 18 जून : जळगाव जिल्ह्यासह राज्यभरात उद्या, 19 जूनपासून पोलीस भरतीसाठी मैदानी चाचणीची प्रक्रिया सुरू होणार आहे. या पार्श्वभूमीवर जळगाव जिल्हा पोलीस अधीक्षक डॉ.महेश्वर रेड्डी यांनी पत्रकार परिषद घेत महत्वाची माहिती दिली आहे. जळगाव जिल्हा पोलीस भरतीकरिता अनेक उमेदवारांनी दोन पदांकरिता अर्ज केले आहे. तसेच अनेकांना दोन पदांकरिता मैदानी चाचणीसाठी एकाच दिवशी किवा लागोपाठ बोलावल्याची स्थिती निर्माण होणार आहे. त्यामुळे उमेदवारांना सोयीचे व्हावे याकरिता त्यांना दुसऱ्या पदासाठी दुसरी तारीख दिली जाणार असल्याची माहिती डॉ. रेड्डी यांनी दिली आहे.
उद्यापासून मैदानी चाचणीस सुरूवात –
महाराष्ट्र राज्य पोलीस दलातील रिक्त पदे भरण्यासाठी मैदानी चाचणीची प्रक्रिया उद्या, 190 जूनपासून संपूर्ण राज्यभर सुरु होणार आहे. उमेदवारांना विविध पदांकरिता (पोलीस शिपाई, चालक, बँडसमन, सशस्त्र पोलीस शिपाई, तुरुंग विभाग शिपाई) एका घटकात किवा वेगवेगळ्या घटकांत अर्ज करता येतात. त्यानुसार काही उमेदवारांना एकाच दिवशी अथवा लागोपाठचे दिवशी दोन पदांकरिता मैदानी चाचणी साठी हजर राहणे बाबतची स्थिती निर्माण होवू शकते व त्यामुळे काही उमेदवारांची गैरसोय होवू शकते. म्हणून सर्व घटक प्रमुखांना व महा आयटी विभागास सूचना देण्यात आली आहे.
एकाच वेळी दोन पदांकरिता मैदानी चाचणी, तर काय कराल? –
ज्या उमेदवारास एकाच वेळी दोन पदांकरिता मैदानी चाचणीस हजर राहणेसाठी सूचना दिली असेल असा उमेदवार पहिल्या ठिकाणी हजर राहिल्यानंतर त्या उमेदवारांना दुसऱ्या ठिकाणी वेगळी तारीख देण्यात यावी. दुसऱ्या ठिकाणचे घटक प्रमुखांनी अशा उमेदवारांची मैदानी चाचणी घ्यावी. तसेच मैदानी चाचणीची पहिली तारीख आणि दुसरी तारीख यामध्ये किमान 4 दिवसांचे अंतर असावे. मात्र, या करिता उमेदवार पहिल्या मैदानी चाचणीस हजर होता याचे लेखी पुरावे दुसऱ्या मैदानी चाचणीवेळी सादर करावे लागतील.
पोलीस भरती 2022-23 मध्ये ज्या उमेदवारांनी एका पेक्षा जास्त पदांकरिता अर्ज केले आहेत आणि त्यांची मैदानी चाचणी एकाच दिवशी आली असेल अशा उमेदवारांना किमान 4 दिवस अंतराने वेगवेगळ्या तारखा दिल्या जातील. उमेदवारांना अडचण / शंका असल्यास त्यांनी raunak.saraf@mahait.org यावर ईमेल करावा” असे जनसंपर्क अधिकारी, जळगाव पोलीस यांनी प्रसिद्धी पत्रकाद्वारे कळविले आहे.
हेही वाचा : आनंदवार्ता! जळगाव जिल्ह्यात जोरदार पावसाची हजेरी, शेतकऱ्यांमध्ये समाधान
