जळगाव : गेल्या अनेक दिवसांपासून जळगावहून पुण्याला विमानसेवा सुरू होणार अशी चर्चा सुरू होती. अखेर आता या चर्चांना पूर्णविराम मिळाला आहे. जळगाव जिल्ह्यातील नागरिकांसाठी एक महत्त्वाची बातमी समोर आली आहे. ती म्हणजे आता जळगावहून पुण्याला विमानाने जाता येणार आहे. आजपासून जळगाव-पुणे विमानसेवा सुरू होत आहे. प्रवाशांची मागणी लक्षात घेता हा महत्त्वाचा निर्णय घेण्यात आला.
जळगाव राज्यातील महत्त्वाचा जिल्हा –
जळगाव हा राज्यातील एक महत्त्वाचा आर्थिक केंद्र असलेला जिल्हा आहे. त्यामुळे फक्त महाराष्ट्रच नव्हे तर देशभरातील लोकांसाठी ही एक मोठी बाजारपेठ मानली जाते. अशा स्थितीत मेट्रो सिटीतून येणाऱ्या लोकांसाठी तसेच येथील नागरिकांसाठी विमानसेवा सुरू करण्याबाबत केल्या अनेक वर्षांपासून प्रयत्न सुरू होते. त्यात जळगाव-मुंबई विमानसेवा सुरू झाली होती. मात्र, अनेकदा ती विमानसेवा बंद झाल्याचे दिसले. त्यामुळे नागरिक निराश झाले होते.
यातच आता जळगाव ते हैदराबाद विमानसेवा सुरू झाली आहे. गेल्या महिन्यात फ्लाय 91 कंपनीने जळगाव विमानतळावरून गोवा आणि तेलंगाणा राज्यातील हैदराबादसाठी विमानसेवा सुरू केली. या विमानसेवेला चांगला प्रतिसाद मिळत आहे. यातच आता जळगावच्या नागरिकांसाठी आणखी एक आनंदाची बातमी आहे. जळगाववरुन पुण्याला जाण्यासाठी आजपासून विमानसेवा सुरू होत आहे.
तिकीट दर किती?
भारत सरकारच्या नागरी उड्डाण मंत्रालयाच्या मान्यतेनुसार, उडान 5.0 योजने अंतर्गत प्लाय91 कंपनीने जळगाव ते पुणे विमानसेवा सुरू केली आहे. त्यामुळे आता जळगावहून पुण्याला विमानाने जाता येणार आहे. तर जळगावहून पुण्याला विमानाने जाण्यासाठी 1991 रुपये इतके भाडे द्यावे लागणार आहे. गोवा-जळगाव-गोवा ही सेवा दररोज तर पुणे-जळगाव-पुणे ही सेवा आठवड्यातील मंगळवार, गुरुवार, शुक्रवार आणि रविवार अशी राहील. यासाठी तिकिट बुकिंगलाही सुरुवात झाली आहे. यातच आता पुण्याला विमानसेवा सुरू झाल्याने नागरिकांमध्ये आनंदाचे वातावरण आहे.
