जळगाव, 3 सप्टेंबर : खेलो इंडिया KIRTI (Khelo India Rising Talent Identification) मूल्यांकन शिबिराचे आयोजन 4 ते 6 सप्टेंबर 2024 दरम्यान जळगावातील एम. जे. कॉलेजमधील एकलव्य क्रीडा संकुल येथे करण्यात आले आहे. या शिबिराचे उद्घाटन केंद्रीय युवक कल्याण आणि क्रीडा राज्यमंत्री रक्षा खडसे यांच्या उपस्थितीत उद्या, 4 सप्टेंबर रोजी सकाळी 9 वाजता होणार आहे. यावेळी त्या खेळाडूंना मार्गदर्शन करणार असून क्रीडा क्षेत्रातील विविध उपक्रमांच्या बाबतीत चर्चा करतील.
जळगाव जिल्ह्यातील विद्यार्थी नोंदवणार सहभाग –
खेलो इंडियाच्या मूल्यांकन शिबिराच्या माध्यमातून राष्ट्रीय स्तरावरील कुस्ती, बॉक्सिंग, धनुर्विद्या, हॉकी ,खोखो, कबड्डी, वेटलिफ्टिंग, हॉलीबॉल, फुटबॉल, ऍथलेटिक या दहा क्रीडा प्रकारांकरिता शारीरिक क्षमता चाचणी तसेच खेळातील कौशल्य विकास यांचे मूल्यमापन होणार आहे. यासाठी एकलव्य क्रीडा संकुलचे 40 प्रशिक्षक व 30 स्वयंसेवक कार्यरत राहणार आहेत. जळगाव जिल्ह्यातील सर्व शाळा महाविद्यालयातून जवळपास 8 ते 10 हजार विद्यार्थी आपला सहभाग नोंदवतील, अशी माहिती मु. जे. महाविद्यालयाचे क्रीडा संचालक तथा एकलव्य क्रीडा संकुलचे संचालक श्रीकृष्ण बेलोरकर यांनी दिली आहे.
खेळाडूंच्या गुणवत्तेचे मूल्यांकन करण्याचा उद्देश –
खेलो इंडिया KIRTI कार्यक्रमाचा उद्देश खेळाडूंच्या गुणवत्तेचे मूल्यांकन करणे हा आहे. या शिबिरामुळे जळगाव आणि परिसरातील क्रीडाप्रेमी आणि खेळाडूंना मोठ्या प्रमाणात प्रोत्साहन मिळणार आहे. या शिबिरात विविध क्रीडा प्रकारांसाठी कौशल्ये तपासण्यात येणार आहेत. खेळाडूंच्या व तज्ञ क्रीडा मार्गदर्शकांच्या सहभागाने या शिबिराचे आयोजन अत्यंत यशस्वी ठरेल, असा विश्वास मूळजी जेठा महाविद्यालयाचे प्राचार्य डॉ. स. ना. भारंबे यांनी व्यक्त केला आहे.
दरम्यान, के. सी.ई. सोसायटी जळगाव द्वारा संचालित नंदु बेंडाळे यांच्या संकल्पनेतून खान्देशातील विद्यार्थ्यांना विविध खेळ प्रकारात पारंगत होता, यावे म्हणून एकलव्य क्रीडा संकुलाची निर्मिती झाली आहे. यामध्ये विविध खेळांचे प्रकार शिकविले जातात. यातूनच अनेक विद्यार्थी राष्ट्रीय, राज्य व जिल्हास्तरावर आपले कर्तृत्व सिद्ध करत आहेत.
हेही वाचा : “एकाला प्रस्थापित केलं आता दुसऱ्याला…”, आमदार चंद्रकांत पाटील यांची एकनाथराव खडसेंवर टीका
