नाशिक, 28 मार्च : नाशिकमध्ये 2027 साली कुंभमेळा आयोजित केला जाणार असताना प्रशासनाची आतापासूनच तयारी सुरू झालीय. दरम्यान, नाशिकच्या कुंभमेळ्याच्या नामकरणावरुन वाद सुरू आहे. नाशिकमधील कुंभमेळ्याला त्र्यंबकेश्वरचं नाव द्यायचं की नाशिकचं महाकुंभ नाव द्यायचं यावरुन महंतांमध्ये जुंपलीय. असे असताना मंत्री गिरीश महाजन यांनी मध्यस्थी केल्याने हा वाद मिटल्याचे समजते.
नाशिकच्या कुंभमेळ्याच्या नामकरणावरुन वाद सुरू झाल्याचे समजताच मंत्री गिरीश महाजन हे काल रात्री उशिराने नाशिकमध्ये दाखल झाले होते. आज मंत्री महाजन यांनी अखिल भारतीय आखाडा परिषदेचे राष्ट्रीय अध्यक्ष रवींद्र पुरी यांची भेट घेतली. गिरीश महाजन आणि रवींद्रपुरी महाराज यांच्यात बंद दाराआड चर्चा झाली. यानंतर आगामी सिंहस्थ कुंभमेळ्याच्या नावाच्या वादावर अखेर पडदा पडल्याचे समजते. या पार्श्वभूमीवर मंत्री गिरीश महाजन यांनी माध्यमांसोबत संवाद साधला.
मंत्री गिरीश महाजन काय म्हणाले? –
सर्वच पवित्रस्थान हे नाशिक जिल्ह्यात आहेत. म्हणजे अगदी जवळपासचा सर्व परिसर घेतला तर अगदी आगळं वेगळ महत्व त्याठिकाणचे आहे. त्यामुळे हा वादाचा विषय होऊच शकत नाही. निश्चित नाशिक कुंभमेळा नाही तर ‘नाशिक त्र्यंबकेश्वर कुंभमेळा’ असा नामोल्लेख आम्ही सर्व ठिकाणी करणार असल्याची माहिती मंत्री गिरीश महाजन यांनी माध्यमांसोबत बोलताना आज दिली.
‘नाशिक त्र्यंबकेश्वर कुंभमेळा’ असा नामोल्लेख होणार –
नाशिकमध्ये सिंहस्थ कुंभमेळ्याच्या नावाच्या वादावर आज अखेर पडदा पडला असून नाशिक कुंभमेळ्याचा उल्लेख आता ‘नाशिक त्र्यंबकेश्वर कुंभमेळा’ असा केला जाणार आहे.
