मुंबई, 3 जून : लोकसभा निवडणुकीच्या निकाला अवघे काही तास उरले असतानाच मुंबईतून धक्कादायक बातमी समोर आली आहे. आयएएस अधिकाऱ्याच्या मुलीने मंत्रालयासमोरील इमारतीवरून उडी मारत आत्महत्या केल्याची खळबळजन घटना मुंबईत घडली. या मुलीचे नाव लिपी रस्तोगी (वय 27) असून रूग्णालयात दाखल करण्यापुर्वीच तिचा मृत्यू झाल्याची माहिती समोर आली आहे.
काय आहे संपुर्ण बातमी? –
मिळालेल्या माहितीनुसार, आयएएस अधिकारी विकास आणि राधिक रस्तोगी यांच्या मुलीने आत्महत्या केली. विकास रस्तोगी हे सध्या उच्च आणि तंत्रशिक्षण या विभागाचे सचिव आहेत. विकास रस्तोगी१९९७ च्या आयएएस बॅचचे अधिकारी आहेत. मुंबईतील नरिमन पॉईंट परिसरात मंत्रालयासमोर असलेल्या सुरुची या इमारतीमध्ये हे आयएएस दाम्पत्य राहते. दरम्यान, रस्तोगी दाम्पत्याची मुलगी लिपीने राहत्या इमारतीवरुन उडी घेऊन आत्महत्या केली.
लिपी रस्तोगी होती नैराश्यात?-
मिळालेल्या प्राथमिक माहितीनुसार, मृत मुलगी हरियाणातील सोनिपत येथे एलएलबीचे शिक्षण घेत होती. लिपी रस्तोगी ही अभ्यासात तितकीशी पुढे नव्हती आणि त्यामुळे ती नैराश्यात होती. आई-वडील इतके मोठे अधिकारी असून आपण त्यासाठी पात्र आहोत की नाही? अशी भीती लिपी रस्तोगीला सतावत होती. त्यातूनच तिने आयुष्य संपवल्याची चर्चा सुरू असल्याचे समजते.
दरम्यान, तिने आत्महत्येपूर्वी एक सुसाईड नोट लिहून ठेवली होती. यामध्ये तिने आपल्या मृत्यूसाठी कोणालाही जबाबदार धरलेले नाही, असे लिहिल्याचे समजते. यानंतर कफ परेड पोलीस ठाण्यात अनैसर्गिक मृत्यूची नोंद करण्यात आली असून सध्या पोलीस या प्रकरणाचा सर्व बाजूंनी तपास करत आहेत.
हेही वाचा : प्रिया अन् दिव्याने शिरसोलीच्या तरुणाला लावला 5 लाखांचा चुना, नेमकं प्रकरण काय?
