पुणे, 24 जानेवारी : दहावी आणि बारावीतील विद्यार्थ्यांच्या बोर्ड परीक्षांसाठी राज्य सरकारने महत्वाचा निर्णय घेतला आहे. मागीलवर्षी प्रमाणे यावर्षी सुद्धा दहावी बारावी बोर्ड परीक्षेमध्ये परीक्षेच्या निर्धारित वेळेनंतर दहा मिनिटे वाढवून दिली जाणार आहेत.
काय आहे संपूर्ण बातमी? –
उच्च माध्यमिक प्रमाणपत्र व माध्यमिक शालान्त प्रमाणपत्र म्हणजेच दहावी-बारावीची परीक्षा देणाऱ्या परीक्षार्थ्यांना प्रश्नपत्रिका वाचण्यासाठी (आकलन होण्यासाठी) परीक्षा दालनात प्रश्नपत्रिकांचे वाटप परीक्षेच्या निर्धारीत वेळेपूर्वी दहा मिनिटे अगोदर करण्यात येत होते. दरम्यान, विद्यार्थांना या वर्षी देखील परीक्षेच्या निर्धारित वेळेनंतर दहा मिनिटे वाढवून दिली जाणार आहेत.
बोर्डाच्या परीक्षेत विद्यार्थ्यांना मिळणार 10 मिनिटांचा जास्त वेळ-
प्रश्नपत्रिका मोबाईलवर तसेच अन्य समाज माध्यमातून व्हायरल इाल्याच्या अफवा व काही अंशी अशा घटना परिक्षा काळात घडून येतात. म्हणून अशा प्रकारच्या घटनांना प्रतिबंध व्हावा तसेच परीक्षा निकोप, भयमुक्त व कॉपीमुक्त वातावरणात सुरळीत पार पडाव्यात यासाठी परीक्षेच्या निर्धारीत वेळेपूर्वी दहा मिनिटे अगोदर प्रश्नपत्रिका वितरीत करण्याची सुविधा फेब्रुवारी-मार्च 2023 परीक्षेपासून रद्द करण्यात आलेली होती. विद्यार्थ्यांचे हित लक्षात घेत पालक, विद्यार्थ्यांच्या मागणीचा विचार करून दहा मिनिटे परीक्षेच्या निर्धारित वेळेनंतर दिली जाणार आहेत.
हेही वाचा : उद्धव ठाकरे यांचा भाजपवर निशाणा; म्हणाले, आमचा ‘भाजपमुक्त’ श्रीरामचा नारा! तर मुख्यमंत्र्यांचाही यावर पलटवार
