जालना, 18 जुलै : मनोज जरांगे यांना डीडी म्हणजे देवेंद्र द्वेषाचा रोग झाल्याची टीका भाजप आमदार प्रसाद लाड यांनी केली होती. दरम्यान, यावर मनोज जरांगे चांगलेच आक्रमक झाल्याचे पाहायला मिळाले. माझ्या नादी लागू नका, तू किती पैसेवाला आणि करप्ट आहेस हे सांगायलं लाऊ नको, तू जात विकून घर मोठं करणारी औलाद आहेत, अशी जोरदार टीका यावेळी जरांगे यांनी लाड यांच्यावर केली. जालन्यात आयोजित केलेल्या पत्रकार परिषदेत ते बोलत होते.
काय म्हणाले मनोज जरांगे पाटील? –
मनोज जरांगे माध्यमांसोबत संवाद साधताना म्हणाले की, देवेंद्र फडणवीस हे मराठ्यांच्या जीवावर मोठे झालेत, आता मराठे आमदार आणि मंत्री मराठ्यांच्याच अंगावर घालत मजा पाहत आहेत. दरम्यान, मराठ्यांचे आमदार, मराठ्यांचे मंत्री मराठ्यांवर घालू नका असा इशारा मनोज जरांगे यांनी उपमुख्यमंत्री फडणवीसांना दिला. तुम्हाला गोडीत सांगतोय, मराठ्यांमध्ये मारामाऱ्या लावू नका, आता मराठे तुमच्याकडे निघतील. तुम्ही मराठ्यांच्या जीवावर मोठे झाला, आता मारामाऱ्या लावून मजा बघू नका, असे जरांगे म्हणाले.
‘देवेंद्र फडणवीसांसोबत लग्न कर’ –
ठाण्याच्या पोलीस भरतीत तिथल्या एसपीने कुणबी सर्टिफिकेट असलेल्या 400 ते 500 मुलांना बाहेर काढले आणि ओपनमध्ये टाकले. त्यावर प्रसाद लाडने देवेंद्र फडणवीसांना जाब विचारला पाहिजे. ओपनमध्ये जा नाहीतर रिजेक्ट करतो, अशी धमकी ठाण्याच्या एसपीने दिलीय. मग कशाला प्रमाणपत्र दिले आहे? प्रमाणपत्र नसणाऱ्यांना आत घेताय. भंगार लोक आयएएस अधिकारी झालेत आणि प्रमाणपत्र असणाऱ्यांना बाहेर काढले गेले. तुला लई प्रेम असेल तर देवेंद्र फडणवीसांसोबत लग्न कर. माझ्या मुलांचे वाटोळे झाले आहे, त्याचा जाब विचार, असा एकेरी शब्दात उल्लेख करत प्रसाद लाड यांच्यावर जरांगे यांनी जोरदार टीका केली.
हेही वाचा : Arun Bhatia Interview : ‘देशात भ्रष्टाचार एक धंदा’, Ex IAS अधिकारी अरुण भाटीया यांची स्फोटक मुलाखत
