जळगाव : जळगाव तालुक्यातील भोकर येथे कापूस पिकाच्या शेतीत गांजाची झाडे लागवडीचा प्रकार समोर आला आहे. याप्रकरणी प्रकाश दशरथ सोनवणे (वय-58, रा. भोकर, ता. जळगाव) या शेतकऱ्याच्या शेतात कारवाई करत तब्बल 27 गांजाची झाडे जप्त करण्यात आली.
काय आहे संपूर्ण घटना –
जळगाव तालुक्यातील भोकर-पळसोद शिवारात गांजाची शेती केली जात असल्याची माहिती पोलिसांना मिळाली होती. माहिती मिळाल्यानंतर जिल्हा पोलीस अधीक्षक डॉ. महेश्वर रेड्डी यांनी कारवाईच्या सूचना दिल्या. त्यानुसार अपर पोलीस अधीक्षक अशोक नखाते, उपविभागीय पोलिस अधिकारी संदीप गावित यांच्या मार्गदर्शनाखाली तालुका पोलीस ठाण्याचे पोलीस निरीक्षक महेश शर्मा, सपोनि अनंत अहिरे, पोउनि गणेश सायकर, नयन पाटील, पोहेकों दीपक चौधरी, बापू पाटील, किरण अगोणे, चेतन पाटील, प्रवीण पाटील, दिनेश पाटील हे संबंधित शेतात पोहोचले.
घटनास्थळी काय आढळले –
पोलीस पथक प्रकाश दशरथ सोनवणे या शेतकऱ्याच्या शेतात पोहोचल्यावर त्यांना कापूस पिकाच्या शेतीत गांजाच्या 27 झाडांची लागवड केल्याचे आढळले. या झाडांची वाढ 5 ते 6 फुटांपर्यंत झाली होती. याप्रकरणी पोलिसांनी नायब तहसीलदार दिलीप बारी, कृषी अधिकारी अमित भामरे, वजन मापे निरीक्षक अनंत पाटील यांना बोलवून खात्री करीत पंचनामा केला. तसेच ही सर्व झाडे जप्त करण्यात आली आहे.
बुधवारी दुपारी चार वाजताच्या सुमारास भोकर-पळसोद शिवारात ही कारवाई करण्यात आली. जप्त करण्यात आलेल्या या झाडांचे वजन 12 किलो असून यांची अंदाजे किंमत ही 40 हजार रुपये असल्याचे सांगण्यात आले आहे. दरम्यान, हा प्रकार समोर आल्यानंतर या प्रकरणी शेतकऱ्याविरुद्ध गुन्हा दाखल करून त्याला अटक करण्यात आली आहे.
