जळगाव – जळगाव शहरातील एमआयडीसी भागात असलेल्या मानराज मोटर मारुती सर्व्हिस शोरूममध्ये आग भीषण आग लागल्याची घटना समोर आली आहे. ही घटना आज सकाळी सव्वा सात वाजेच्या सुमारास घडली. ही आग इतकी भीषण होती की यामध्ये तब्बल दीड ते दोन कोटींचे नुकसान झाल्याची प्राथमिक आहे. सुदैवाने यात कोणतीही जीवितहानी झाली नाही.
काय आहे संपूर्ण घटना –
मिळालेल्या माहितीनुसार, जळगाव शहरातील छत्रपती संभाजीनगर महामार्गावरील एमआयडीसी भागात असलेल्या मानराज सुझुकी शोरूमला आज सकाळी सव्वा सात वाजेच्या सुमारास भीषण आग लागली. ही आग छतावरती लावलेल्या सोलर पॅनलच्या शॉर्टसर्किटमुळे लागल्याचा अंदाज शोरुमचे मालक अशोक बेदमुथा यांनी म्हटले आहे. या आगीत तब्बल दीड ते दोन कोटी रुपयांचे नुकसान झाल्याचेही त्यांनी सांगितले.
शोरुमचे मालक अशोक बेदमुथा यांनी याबाबत सांगितले की, वर काहीतरी धूर निघत आहे तुम्ही ताबडतोब या, असा सकाळी सव्वासात वाजता सुरक्षा रक्षकाचा फोन आला. तसाच शोरुमला पोहोचलो. तोपर्यंत आम्ही अग्निशमन दलाला फोन केला होता. त्यानंतर तत्काळ नगरपालिकेच्या अग्निशमनदलाच्या 4 गाड्या घटनास्थळी पोहोचल्या.
आग वरती सोलर पॅनलपासून सुरुवात झाली होती. मी आल्यावर पाहिले की, वर सोलर पॅनेलला आग लागली होती. पण ती आग इतकी भयानक होती की, ती हळूहळू आतमध्ये तिसऱ्या माळ्यावर शिरली. तिसऱ्या माळ्यावर माझं अकाऊंट डिपार्टमेंट होतं. त्यामध्ये 8 ते 10 वर्षाची सर्व कागदपत्रे, रेकॉर्ड होती, लाकडाचे फर्निचर असल्याने आग पसरत गेली.
अग्निशमन दलाच्या 4 गाड्या आल्याने जवळपास दीड तासात आगीवर नियंत्रण मिळवायला लागले. या आगीत स्पेअर पार्ट, अॅसेसरीज आणि अकाऊंटींग असे तीन विभागापर्यंत ही आग पसरली. यामध्ये प्राथमिक स्तरावर तब्बल दीड ते दोन कोटींचं नुकसान झाले आहे.
