संदीप पाटील, प्रतिनिधी
पारोळा, 9 जुलै : शेतकऱ्यांच्या शेतमालाला हमीभाव मिळावा, यासाठी रब्बी पणन हंगाम 2023-2024 किमान आधारभुत योजने अंतर्गत ज्वारी खरेदीचे ऑनलाईन पोर्टल सुरू करण्यात आले आहे. या योजनेअंतर्गत हजारो शेतकऱ्यांनी नोंदणी केली आहे.
ज्वारी खरेदीचे ऑनलाईन पोर्टल तात्काळ सुरु करण्याची मागणी –
ज्वारी खरेदीसाठी असलेले एनईएमएल हे ऑनलाईन पोर्टल 27 जुन 2024 पासुन बंद पडले आहे. त्यामुळे ही खरेदी पुर्णतः बंद पडली आहे. दरम्यान, ज्वारी खरेदीसाठी दि. 31 जुलै 2024 ही शेवटची मुदत आहे, त्याकरिता लवकरात लवकर ऑनलाईन पोर्टल सुरु करण्यात यावे, अशी मागणी आमदार चिमणराव पाटील यांनी केलीय.
चिमणराव पाटील यांनी मुख्यमंत्री एकनाथ शिंदे तसेच अन्न, नागरी पुरवठा मंत्री छगन भुजबळ आणि अन्न, नागरी, पुरवठा व ग्राहक संरक्षण कायदा विभागाचे मुख्य सचिव रणजितसिंह देओल यांची भेट घेत लेखी निवेदन दिले.
काय आहे संपुर्ण बातमी? –
एरंडोल विधानसभा मतदारसंघासह संपुर्ण जळगांव जिल्ह्यातील ज्वारी खरेदी बंद आहे. रब्बी पणन हंगाम 2023-2024 किमान आधारभुत योजने अंतर्गत शासकीय ज्वारी खरेदी योजना, ही गेल्या महिन्या भरापासून सुरु करण्यात आली होती. परंतु गेले 12 दिवस झाले खरेदी बंद करण्यात आली आहे. यासाठी योजनेचे ऑनलाईन पोर्टल बंद असल्याने ज्वारी खरेदी बंद असल्याचे कारण पुढे करण्यात येत आहे.
परिणामी हजारो शेतकरी हे ज्वारी खरेदी पासुन अद्याप वंचित आहेत, त्यामुळे शेतकऱ्यांमध्ये तीव्र संताप व्यक्त केला जात आहे. दरम्यान, ज्वारी खरेदीचे ऑनलाईन पोर्टल तात्काळ सुरु करण्यात यावे, अशी मागणी आमदार चिमणराव पाटील यांनी केली आहे.
हेही वाचा : Special Interview : 7 हजार 200 कोटींचा प्रकल्प; जळगाव जिल्ह्यातील सात तालुक्यांना होणार मोठा फायदा
