ईसा तडवी, प्रतिनिधी
पाचोरा, 18 जून : पाचोरा शहरातील शिवतीर्थ जय किसान कॉलनी येथे बांधकाम कामगारांसाठी गृह उपयोगी भांड्यांचे वाटप शिबिर आमदार किशोर आप्पा पाटील यांच्या उपस्थितीत काल 17 जून रोजी मोठ्या उत्साहात पार पडले. या शिबिरात नोंदणी केलेल्या बांधकाम कामगारांना गृह उपयोगी भांड्यांचे वाटप करण्यात आले. दरम्यान, बांधकाम कामगार नोंदणीसाठीची वेबसाइट सध्या बंद असल्याने आमदार पाटील यांनी महत्वाचे आवाहन केलंय.
आमदार किशोर आप्पा पाटील काय म्हणाले? –
ज्या बांधकाम कामगारांची ऑनलाईन नोंदणी झालीय त्यांना गृह उपयोगी भांडे मिळण्यासाठी कुठलीही अडचण येणार नसून त्यांना त्यांच्या घरापर्यंत ते पोहचवले जातील. मात्र, गेल्या चार-पाच दिवसांपासून महाराष्ट्रात बांधकाम कामगार नोंदणीसाठीची वेबसाइट सध्या बंद असून ती वेबसाईट अपडेट करण्याचे काम शासनाकडून सुरू आहे.
म्हणून येत्या आठ-दहा दिवसांत ती वेबसाईट पुन्हा चालू होणार आहे. दरम्यान, पुन्हा एकदा वेबसाईट चालू झाल्यानंतर नोंदणी प्रक्रिया पुर्ण करून 100 टक्के बांधकाम कामगारांपर्यंत साहित्य पोहचविले जाण्यासाठी प्रयत्न केले जातील, असे आवाहन आमदार किशोर आप्पा पाटील यांनी केले. पाचोरा-भडगाव तालुक्यात आतापर्यंत 25 हजार बांधकाम मजूरांपर्यंत गृह उपयोगी किटचे वाटप करण्याचे काम लोकप्रतिनिधी तसेच शिवसैनिकांनी यशस्वीरित्या पार पडल्याचे यावेळी आमदार पाटील यांनी सांगितले.
पाचोऱ्यात 150 बांधकाम मजुरांना गृह उपयोगी किटचे वाटप –
पाचोरा शहरातील शिवतीर्थ जय किसान कॉलनी येथे बांधकाम कामगारांसाठी गृह उपयोगी भांड्यांचे वाटप शिबिराचे आयोजन बंडू केशव सोनार यांच्या प्रयत्नातून करण्यात आले. यावेळी 150 बांधकाम मजुरांना गृह उपयोगी किटचे वाटप करण्यात आले. या शिबिरात माजी नगरसेवक महेश सोमवंशी, सुमित पाटील, उपजिल्हा प्रमुख किशोर बारवकर, भीमशक्ती शिवशक्तीचे जिल्हाप्रमुख प्रविण ब्राह्मणे, योगेश पाथरवट, दिलीप परदेशी आदी उपस्थित होते. शिबिराचे व्यवस्थापनासाठी हर्षल दामोदर, कुणाल धनगर, मनीष भोई, राज सोमवंशी, सागर सोनार यांनी सहकार्य केले.
