चंद्रकांत दुसाने, विशेष प्रतिनिधी
मुंबई, दि. 30 : आजपासून महाराष्ट्र विधिमंडळाच्या पावसाळी अधिवेशनाची सुरुवात झाली. आज 30 जूनपासून ते येत्या 18 जुलैपर्यंत हे अधिवेशन चालणार आहे. दरम्यान, आज अधिवेशनाच्या पहिल्या दिवशी विधानसभा अध्यक्ष ॲड. राहुल नार्वेकर यांनी विधानसभेच्या तालिका अध्यक्षांची घोषणा केली. यामध्ये पाचोरा भडगाव विधानसभा मतदारसंघाचे आमदार किशोर आप्पा पाटील यांच्यासह एकूण 9 विधानसभा सदस्यांची तालिका अध्यक्ष म्हणून नियुक्ती करण्यात आली.
वंदे मातरम् व राज्यगीताने कामकाजास सुरुवात –
विधिमंडळाच्या पावसाळी अधिवेशनास आजपासून प्रारंभ झाला. विधानसभेत वंदे मातरम् व राज्यगीताने कामकाजास सुरुवात झाली. विधानसभेचे अध्यक्ष ॲड.राहुल नार्वेकर, मुख्यमंत्री देवेंद्र फडणवीस, विधानसभा उपाध्यक्ष अण्णा बनसोडे, उपमुख्यमंत्री एकनाथ शिंदे, उपमुख्यमंत्री अजित पवार यांच्यासह मंत्रिमंडळातील इतर मंत्रीगण तसेच विधानसभेचे सदस्य सभागृहात उपस्थित होते. मुख्यमंत्री देवेंद्र फडणवीस यांनी नवीन मंत्री छगन भुजबळ यांचा परिचय यावेळी सभागृहाला करून दिला.
या सर्व सदस्यांची विधानसभा तालिका अध्यक्ष म्हणून नियुक्ती –
आज अधिवेशनाच्या पहिल्या दिवशी विधानसभा अध्यक्ष ॲड. राहुल नार्वेकर यांनी विधानसभेच्या तालिका अध्यक्षांची घोषणा केली. यामध्ये पाचोरा भडगाव विधानसभा मतदारसंघाचे आमदार किशोर आप्पा पाटील यांच्यासह एकूण 9 विधानसभा सदस्यांची तालिका अध्यक्ष म्हणून नियुक्ती करण्यात आली. यामध्ये विधानसभा सदस्य अमित साटम, सुलभा खोडके, चेतन तुपे, नितीन देशमुख, संजय मेश्राम, अभिजीत पाटील, समीर कुणावार, समाधान अवताडे यांची तालिका अध्यक्ष म्हणून नियुक्ती करण्यात आली.
विधानसभेचे अध्यक्ष आणि उपाध्यक्ष यांच्या अनुपस्थितीत कामकाज पाहण्यासाठी तालिका अध्यक्षांची निवड केली जाते. विधानसभेचे सदस्य असलेले काही अनुभवी सदस्य तालिका अध्यक्ष म्हणून निवडले जातात. विधानसभा अध्यक्षांच्या गैरहजेरीत तालिका अध्यक्ष हे सभागृहाचे कामकाज चालवतात आणि सभागृहातील नियमांनुसार कामकाज सुरळीत ठेवण्याची जबाबदारी त्यांच्यावर असते.
