छत्रपती संभाजीनगर, 5 फेब्रुवारी : छत्रपती संभाजीनगर जिल्हा परिषद व पंचायत समिती निवडणुकीच्या जाहीर प्रचाराचा आज (गुरुवारी) शेवटचा दिवस होता. आज सायंकाळी ५ वाजता प्रचारतोफा थंडावल्या असून शनिवार 7 फेब्रुवारी रोजी मतदान पार पडणार आहे. या पार्श्वभूमीवर शिवसेनेच्या उमेदवारांच्या प्रचारसाठी पाचोरा-भडगावचे आमदार किशोर आप्पा पाटील यांच्या बनोटी आणि गोंदेगाव येथे जाहीर सभा पार पडल्या. याप्रसंगी कन्नड-सोयगावच्या आमदार संजनाताई जाधव यांच्यासह शिवसेनेचे उमेदवार तसेच पदाधिकारी-कार्यकर्ते मोठ्या संख्येने उपस्थित होते.
जि.प./पंचायत समितीच्या निवडणुकीसाठी प्रचार –
छत्रपती संभाजीनगर जिल्ह्यातील बनोटी आणि गोंदेगाव येथे आमदार किशोर आप्पा पाटील यांची आज 5 फेब्रुवारी रोजी जाहीरसभा पार पडली. पुजा भरत वाघ (उमेदवार, गोंदेगाव-बनोटी जि.प गट), काजल भूषण पाटील (उमेदवार, बनोटी पंचायत समिती गण), गयाबाई गोविंदा घोडे (उमेदवार, गोंदेगाव पंचायत समिती गण) या शिवसेना उमेदवारांच्या प्रचारार्थ त्यांची जाहीरसभा पडली.
तत्कालीन मुख्यमंत्री तथा विद्यमान उपमुख्यमंत्री एकनाथ शिंदे यांनी 2022 ते 2024 या अडीच वर्षांच्या काळात विकासाचा अनुशेष भरून आणि महाराष्ट्राच्या सर्वांगीण विकासासाठी प्रभावी काम केल्याचे सांगितले. तसेच त्यांनी ठाकरे गटाच्या शिवसेनेवरही जोरदार टीका केली. दरम्यान, आजच्या प्रचारसभेला मिळालेल्या प्रतिसादावरून शिवसेनेच्या या तिन्ही उमेदवारांना यांना मोठ्या मताधिक्याने निवडून येतील, असा विश्वास आमदार किशोर आप्पा पाटील यांनी व्यक्त केला.
प्रचाराच्या तोफा थंडावल्या –
छत्रपती संभाजीनगर जिल्हा परिषद व पंचायत समिती निवडणुकीच्या रणधुमाळीतील जाहीर प्रचाराची सांगता आज, गुरुवार दि. 5 फेब्रुवारी रोजी होत आहे. गेल्या 15-20 दिवसांपासून सुरू असलेल्या आरोप-प्रत्यारोप, सभा, रॅली आणि कोपरा सभांच्या धुराळ्यानंतर आज प्रचाराच्या तोफा थंडावल्या आहेत.
पहिल्या टप्प्यातील निवडणुकांसाठी शनिवारी मतदान –
निवडणूक आयोगाच्या सुधारित वेळापत्रकानुसार, शनिवार, दि. ०७ फेब्रुवारी रोजी सकाळी ७.३० ते सायंकाळी ५.३० या वेळेत मतदान प्रक्रिया होणार आहे. मतदानास अवघे दोन दिवस शिल्लक राहिल्याने प्रचाराचा शेवटचा दिवस गाठण्यासाठी सर्वच राजकीय पक्ष आणि उमेदवारांनी आपली संपूर्ण ताकद पणाला लावल्याचे दिसून आले आहे. दरम्यान, आज दिवसभर विविध ठिकाणी शक्तिप्रदर्शनासाठी रॅली तसेच मोटारसायकल फेऱ्यांचे आयोजन करण्यात आल्याचे पाहायला मिळाले.
हेही वाचा : Video | शेतकऱ्यांना कर्जमाफी कधी? उपमुख्यमंत्री एकनाथ शिंदेंनी स्पष्टच सांगितलं, नेमकं काय म्हणाले?
