मुंबई, 3 सप्टेंबर : एसटी महामंडळाच्या कर्मचाऱ्यांनी आजपासून राज्यव्यापी संप पुकारला आहे. त्यांच्या विविध प्रलंबित मागण्यांना घेऊन राज्यस्तरावरील 13 संघटनेची कृती समितीनं संपाची हाक दिल्यानुसार आजपासून संप पुकारण्यात आला आहे. दरम्यान, महाराष्ट्र राज्य मार्ग परिवहन महामंडळाने एसटी कर्मचाऱ्यांना महत्वाचे आवाहन केले आहे.
एसटी महामंडळाने केले महत्वाचे आवाहन –
महाराष्ट्र राज्य मार्ग परिवहन महामंडळाने जारी केलेल्या एका पत्रात नमूद करण्यात आले आहे की, उद्या, दिनांक 4 सप्टेंबर रोजी संध्याकाळी 7 वाजता सह्याद्री अतिथीगृहावर मुख्यमंत्री एकनाथ शिंदे यांनी कामगार संघटनांच्या कृती समितीला त्यांच्या मागण्यांबाबत बैठकीस बोलावले आहे. तरी महामंडळाच्या कर्मचारी बंधू-भगिनींनी ऐन सणासुदीच्या तोंडावर प्रवाशांची गैरसोय होईल, अशा प्रकारे कोणतीही कृती करू नये, असे आवाहन एसटी महामंडळाने केले आहे.
जळगाव जिल्ह्यात काय होती नेमकी स्थिती? –
जळगाव शहरातील बस आगार हे आज पुर्णतः बंद होते. तर चाळीसगाव, पाचोरा, भुसावळ हे बस आगारातील कर्मचाऱ्यांनी धरणे आंदोलन करत बंदची हाक दिली. तसेच पारोळा आणि चोपडा, भडगाव, इत्यादी ठिकाणचे बस आगार अंशतः सुरू असल्याचे दिसून आले. दरम्यान, काही प्रवाशी या बसस्थानकांवर तात्कळत बसल्याने प्रवाशांचे हाल होत असल्याचे देखील चित्र दिसून आले आहे तर काही ठिकाणी शुकशुकाट होता.
एसटी कर्मचाऱ्यांच्या काय आहेत मागण्या? –
- राज्य सरकारी कर्मचाऱ्यांप्रमाणेच एसटी कर्मचाऱ्यांना वेतन मिळावे.
- वेतनवाढीच्या दराचा फरक तसेच 4849 कोटी रुपयांमधील शिल्लक रकमेचे वाटप करावे.
- नुकत्याच मुळ वेतनात जाहीर केलेल्या पाच हजार, चार हजार आणि अडीच हजार रुपयांऐवजी सरसकट 5000 रुपये हजार मिळावेत.
- 2018 ते 2024 पर्यंतच्या वाढीव महागाई भत्त्याची थकबाकी मिळावी.
- शासकीय कर्मचाऱ्यांप्रमाणे घरभाडे भत्ता व वार्षिक वेतनवाढ मिळावी.
- 58 महिन्यांच्या कालावधीची वार्षिक वेतनवाढीची थकबाकी मिळावी.
- 57 महिन्यांच्या कालावधीचा घरभाडे भत्त्याची थकबाकी मिळावी.
- प्रलंबित महागाई भत्ता आणि फरक, वाढीव घरभाडे भत्ता आणि फरक मिळावा.
