जळगाव : काल गुढीपाडव्याचा सण मोठ्या उत्साहात साजरा करण्यात आला. यानंतर आज पवित्र रमजान ईद साजरी केली जात आहे. यातच आता सुवर्ण नगरी जळगावमध्ये सोन्याच्या दरात मोठी वाढ झाल्याचे दिसून येत आहे. मागील 24 तासात तब्बल 1 हजार रुपयांची वाढ झाल्याचे पाहायला मिळत आहे.
आज सोन्याचे दर हे जीएसटीसह 93 हजार 500 रुपयांपर्यंत जाऊन पोहोचल्याचे दिसत आहे. तसेच आगामी काळात हे सोन्याचे दर आणखी वाढण्याची शक्यता वर्तवली जात आहे. तर आजचे हे दर ऐकून मोठा धक्का बसल्याचे ग्राहक सांगत आहेत. त्यामुळे ग्राहकांच्या खिशाला मोठा भार पडणार असल्याचे दिसून येत आहे.
सोन्याच्या दरात मोठी वाढ –
मागील अनेक दिवसांपासून सोन्याच्या दरात मोठी वाढ होत आहे. यामुळे सर्वसामान्य नागरिकांना सोने खरेदी करणे पडवत नसल्याचे चित्र आहे. तर तेच दुसरीकडे सोन्यामध्ये केलेली गुंतवणूक फायदेशीर ठरत असल्याने मोठ्या संस्था, श्रीमंत लोक मोठ्या प्रमाणात सोन्याची खरेदी करत आहेत. दिवसेंदिवस सोन्याचे दर वाढतच आहेत. यामुळे या नागरिकांना सोन्यात केलेली गुंतवणूक फायद्याची ठरत आहे. पण या सोन्याच्या किंमती कधी कमी होणार असा सवालही ग्राहक उपस्थित करत आहेत.
सोन्याचे दर वाढण्याचे नेमकं काय कारण –
अमेरिकेच्या राष्ट्राध्यक्ष पदी डोनाल्ड ट्रम्प सत्तेत आले आहे. त्यांनी सत्तेत आल्यानंतर जाहीर केलेल्या धोरणाचा परिणाम जगाच्या अर्थव्यवस्थेत होत असल्याचे दिसत आहे. रशिया-युक्रेन युद्धात रशियाने तडजोड करावी अशी अमेरिकेची विनंती रशियाने धुडकावून लावली. त्यामुळे पुन्हा एका युद्धजन्य परिस्थिती कायम राहण्याची शक्यता आहे. हे सर्व लक्षात घेता सुरक्षित गुंतवून म्हणून गुंतवणूकदारांनी आपली गुंतवणूक सोन्याकडे वळविली. त्यामुळे सोन्याच्या मागणीत मोठी वाढ झाली. मागील 24 तासात सोन्याचे दर हे 92 हजार 500 वरून 93 हजार 500 वर जाऊन पोहोचले आहेत.
