धुळे, 27 जून : राज्यात अपघाताच्या घटनांमध्ये वाढ होतानाच धुळ्यातून भीषण अपघाताची घटना समोर आली आहे. धुळे शहरातील नागपूर-सुरत महामार्गावरील आनंद खेडा गाव शिवारात झालेल्या अपघातात साक्री पोलीस ठाण्याचे कर्मचारी गुलाब शिंपी यांचा जागीच मृत्यू झाल्याची धक्कादायक घटना घडली असून साक्री पोलिसांनीही तत्काळ घटनास्थळी धाव घेत याप्रकरणी तालुका पोलीस ठाण्यात गुन्हा दाखल करण्याचे काम सुरू केले आहे.
काय आहे संपुर्ण बातमी? –
मिळालेल्या माहितीनुसार, धुळे जिल्ह्यातील साक्री पोलीस ठाण्यात कार्यरत असलेले पोलीस कर्मचारी गुलाब शिंपी हे आपली ड्युटी करुन गावाकडे जात असताना त्यांच्या दुचाकीला अपघात झाला. महामार्गावर पुढे सळई घेऊन जाणाऱ्या कंटेनर चालकाने अचानक ब्रेक दाबल्याने हा भीषण अपघात झाला. कंटनेरचालकाने अचानक ब्रेक दाबल्यामुळे त्यावर दुचाकी धडकून गुलाब शिंपी यांच्या डोक्याला जबर मार बसल्याने ते गंभीर जखमी झाले होते. दरम्यान, घटनेची माहिती मिळताच स्थानिक ग्रामस्थांनी गुलाब शिंपी यांना जखमी अवस्थेत हिरे वैद्यकीय महाविद्यालयात दाखल केले. मात्र, डॉक्टरांनी तपासणी करीत त्यांना मृत घोषित केले.
कुटुंबीयांवर कोसळला दु:खाचा डोंगर –
सन 2014 मध्ये गुलाब शिंपी हे पोलीस खात्यात भरती झाले होते. धुळे जिल्ह्यातील साक्री पोलीस स्टेशनमध्ये ते सध्या कार्यरत होते. गुलाब शिंपी हे धुळे तालुक्यातील आनंदखेडे गावात वास्तव्यास होते आणि ते गावावरुन दुचाकीने दररोज नागपूरमधील साक्री पोलीस ठाण्यात कर्तव्यावर येत होते. मात्र, काल रात्रीची नाईट शिफ्ट संपल्यानंतर आज सकाळी ते साक्रीहून घराकडे जात असताना त्यांच्या दुचाकीला भीषण अपघात झाला.
दरम्यान, गुलाब शिंपी यांच्या अकाल, अपघाती निधनामुळे कुटुंबीयांवर दु:खाचा डोंगर कोसळला असून या घटनेमुळे पोलीस खात्यात हळहळ व्यक्त करण्यात येत आहे. गुलाब शिंपी यांच्या पश्चात आई, वडिल, पत्नी, 5 वर्षांची मुलगी, 3 वर्षांचा मुलगा असा परिवार आहे.
हेही वाचा : अहमदनगर आयुक्तांवर 8 लाखांची लाच मागितल्याप्रकरणी कारवाई, आयुक्त पंकज जावळे फरार, नेमकं काय प्रकरण?
