मुंबई, 3 डिसेंबर : राज्याचे काळजीवाहू मुख्यमंत्री एकनाथ शिंदे हे दरेगावातून ठाण्यात आल्यानंतर त्यांनी काल दिवसभर ठाण्यातील निवासस्थानी विश्रांती घेतली. त्यांच्या कालच्या सर्व बैठका रद्द करण्यात आल्या होत्या. दरम्यान, शिंदेंच्या शिवसेनेचे नेते राहुल शेवाळे यांनी त्यांची भेट घेतल्यानंतर रात्री उशिरा माध्यमांसोबत संवाद साधला.
राहुल शेवाळे काय म्हणाले? –
राहुल शेवाळे म्हणाले की, राज्याचे काळजीवाहू मुख्यमंत्री एकनाथ शिंदे हे दरे गावात गेल्यानंतर त्यांची तब्येती बरी नव्हती. त्याठिकाणी त्यांच्यावर उपचार सुरू होते. यानंतर ते ठाण्यात दाखले झाले. एकनाथ शिंदेंना डॉक्टरांनी विश्रांतीचा सल्ला दिला होता. त्यामुळे त्यांनी दिवसभर विश्रांती घेतली. दरम्यान, एकनाथ शिंदे हे आजपासून सक्रिया होणार असून नियोजित बैठका ते घेणार आहेत. तसेच आमदारांसोबतच्या भेटींना देखील ते वेळ देणार असल्याची माहिती राहुल शेवाळे यांनी दिली आहे.
महायुतीची बैठक केव्हा होणार? –
महायुतीच्या बैठकीबाबत बोलताना राहुल शेवाळे म्हणाले की, जोपर्यंत भारतीय जनता पार्टीचा गटनेता निवडला जात नाही तोपर्यंत महायुतीची बैठक होणार नाही. तसेच भाजपचा गटनेता निवडला गेल्यांतर सरकार स्थापनेबाबतच्या पुढच्या प्रक्रिया पार पडणार आहे.
सत्तास्थापनेआधी महाराष्ट्राचे राजकारण तापले? –
राज्यात महायुतीला निर्विवाद बहुमत मिळाल्यानंतरही आज 10 दिवस उलटले आहेत. मात्र, राज्याचा नवा मुख्यमंत्री कोण असेल तसेच मंत्रीमंडळात कोणाचा समावेश असेल, याबाबत अद्यापही अधिकृतरित्या घोषणा झालेल्या नाहीत. अशातच मुंबईतील आझाद मैदानावर नव्या सरकारच्या मुख्यमंत्र्यांचा शपथविधीसाठी तयारी सुरू असल्याने आज आणि उद्या सत्तास्थापनेच्या पार्श्वभूमीवर नेमक्या कोणता घोषणा होणार? याकडे सर्वांचे लक्ष लागले आहे.
