मुंबई, 15 ऑक्टोबर : आगामी स्थानिक स्वराज्य संस्थांच्या निवडणुकांपूर्वी विरोधकांनी निवडणूक आयोगाविरोधात आक्रमक भूमिका घेतली आहे. महाविकास आघाडीसह मनसे आणि इतर विरोधी पक्षांचे शिष्टमंडळाने राज्य निवडणूक आयुक्त तसेच राज्य निवडणूक मुख्य अधिकाऱ्यांची काल आणि आज (14 व 15 ऑक्टोबर) रोजी भेट घेतली. यानंतर विरोधातील सर्व पक्षांच्या नेत्यांची पत्रकार परिषद पार पडली. या पत्रकार परिषदेत मनसेप्रमुख राज ठाकरेंनी मतदार याद्यांचा घोळ दाखवताच सगळेच हसल्याचे पाहायला मिळाले.
काय म्हणाले राज ठाकरे? –
राज ठाकरे पत्रकार परिषदेत बोलताना म्हणाले की, आम्ही केंद्रीय निवडणूक आयोगाच्या प्रतिनिधींना काल भेटलो आणि आज राज्य तसेच केंद्र निवडणूक आयोगाच्या अधिकाऱ्यांची भेट घेतली. निवडणूक म्हटलं की राजकीय पक्ष मैदानात उतरतात, मतदार मतदानासाठी येतात, आणि आयोग निवडणुकीची प्रक्रिया पार पाडतो. पण जर निवडणूक आयोगाने राजकीय पक्षांना मतदार याद्या दाखवल्याच नाहीत, तर काहीतरी गडबड आहे असंच म्हणावं लागेल.
‘मतदार याद्यांमध्ये सुधारणा केल्याशिवाय निवडणुका घेऊ नका’ –
दरम्यान, 2024 नंतर जाहीर केलेल्या मतदार यादीत नावं आहेत, पण फोटो नाहीत. आम्ही केंद्र आणि राज्य दोन्ही आयोगांच्या प्रतिनिधींना भेटलो, मात्र दोघेही एकमेकांकडे जबाबदारी ढकलतात. मतदार यादीच दाखवली जात नसेल, तर संवाद कसला? असा प्रश्न राज ठाकरेंनी उपस्थित केला. या याद्यांमध्ये आवश्यक सुधारणा केल्याशिवाय निवडणुका घेऊ नयेत, असा इशाराही त्यांनी दिला.
मतदारयादी गोपनीय असते की मतदान गोपनीय असतं? तसेच सीसीटिव्ही आहेत ते हे बघु शकतात…मग आम्ही का नाही? असा सवाल उपस्थित करत पाच वर्ष निवडणुका झाल्या नाहीत, मग अजून सहा महिने उशिरा झाल्या तरी काय फरक पडणार? उद्या-परवा आयोगाचा निर्णय काय येतो ते पाहू, त्यानंतर आम्ही आमचा पुढचा निर्णय जाहीर करू, असेही राज ठाकरे यांनी यावेळी स्पष्ठ केले.
View this post on Instagram
राज ठाकरेंनी मतदार याद्यांचा घोळ दाखवताच सगळेच हसले –
2024 मधील निवडणुकीची मतदार यादीमधील छोटासा तपशील वाचून दाखवतो आणि यामधून तुम्हाला किती घोळ आहे, याचा अंदाज येईल. मतदारसंघ कांदिवली पूर्व, नाव धनश्री कदम आणि वडिलांचं नाव आहे दिपक कदम, वय- 23 वर्षे. आता नाव दिपक कदम, वडिलांचं नाव-दिपक रघुनाथ कदम आणि वय-117 वर्षे. तसेच मतदार संघ 161 चारकोप- नंदिनी महेंद्र चव्हाण, वडिलांचं नाव- महेंद्र चव्हाण आणि वय-124 वर्षे, महेंद्र चव्हाण, वडिलांचं नाव- महेंद्र श्रीनाथ चव्हाण आणि वय-43 वर्षे. यावरुन कोणी कोणाला काढलंय हेच समजत नाहीय, असं राज ठाकरे म्हणाले. यावेळी उपस्थित नेत्यांसह सर्वच पत्रकार हसले.
यांची होती उपस्थिती –
मुंबईतील वाय.बी.चव्हाण येथे पार पडलेल्या या पत्रकार परिषद परिषदेत उद्धव ठाकरे, जयंत पाटील, जितेंद्र आव्हाड, जयंत पाटील (शेकाप), बाळासाहेब थोरात, विजय वडेट्टीवार, रईस शेख, अनिल परब, अनिल देसाई, अजित नवले उपस्थित होते. निवडणूक आयोगासोबत बैठक झाल्यानंतर मविआसह मनसे आणि इतर विरोधी पक्षातील नेत्यांनी ही एकत्रित पत्रकार परिषद घेतली.
