ठाणे, 13 फेब्रुवारी : शिवसेना उबाठा गटाचे उपनेते आणि उद्धव ठाकरे यांचे अत्यंत विश्वासू मानले जाणारे राजन साळवी यांनी शिवसेना आज शिवसेना शिंदे गटात प्रवेश केला. कालच त्यांनी आपल्या उपनेतेपदाचा राजीनामा दिला होता. यानंतर त्यांनी आज ठाण्यात एकनाथ शिंदे यांच्या उपस्थित शिवसेना शिंदे गटात प्रवेश केला. राजन साळवी यांनी शिंदे गटात प्रवेश केल्याने उद्धव ठाकरेंसाठी हा मोठा धक्का मानला जात आहे.
शिवसेनेत फूट पडल्यानंतर मोठ्या प्रमाणात शिंदे गटात इनकमिंग सुरू आहे. ठाकरे गटातून अनेक नेते, पदाधिकारी हे शिंदेंच्या शिवसेनेत प्रवेश करत आहेत. यातच आता उद्धव ठाकरेंना कोकणात आणखी एक मोठा धक्का बसला आहे. कोकणातील शिवसेनेचे मोठे नेते राजन साळवी यांनी उद्धव ठाकरेंची शिवसेना सोडत शिंदेंच्या शिवसेनेत प्रवेश केला आहे.
राजन साळवी हे मातोश्रीचे निष्ठावंत म्हणून ओळखले जात होते. तसेच राजन साळवी हे रत्नागिरी जिल्ह्यात अनेक वर्षे शिवसेनेचे आमदार होते. तर महाराष्ट्र विधानसभेच्या 2024 च्या निवडणुकीत राजन साळवी यांचा पराभव झाला होता. शिवसेना शिंदे गटाचे नेते किरण सामंत यांनी राजन साळवी यांचा राजापूर मतदारसंघातून पराभव केला होता. यानंतर आता त्यांनी ठाकरे गटाला रामराम ठोकत शिंदेंच्या शिवसेनेत जाण्याचा निर्णय घेतला.
आज एकनाथ शिंदे यांच्या उपस्थित त्यांनी हा शिंदेंच्या शिवसेनेत प्रवेश केला. दरम्यान, यासोबत राजन साळवी यांच्या अनेक कार्यकर्त्यांनीही शिंदेसेनेत प्रवेश केला. कोकणातील लांजा, राजापूर आणि साखरपा परिसरात राजन साळवी यांना मानणारा मोठा वर्ग आहे. राजन साळवी यांच्या निर्णयामुळे ठाकरे गटाचे कोकणात मोठे नुकसान होणार आहे. उद्धव ठाकरेंसाठी हा मोठा धक्का मानला जात आहे.
