ईसा तडवी, प्रतिनिधी
पाचोरा, 24 फेब्रुवारी : पाचोरा येथील निर्मल इंटरनॅशनल स्कूलच्या पूर्व प्राथमिक विभागातील विदयार्थ्यांच्या ‘निर्मल उत्सावा’चे आयोजन करण्यात आले. लहान मुलांच्या भावविश्वाला आकार देतांना पालकांची भूमिका अतिशय महत्वपूर्ण आहे, असे प्रतिपादन वैशाली सुर्यवंशी यांनी या कार्यक्रमात केले. तसेच त्यांनी शाळेतील सर्व विदयार्थ्यांचे कौतुक करत विदयार्थ्यांसाठी नैतिक मूल्ये, संस्कार किती महत्वाचे आहेत यासाठी उपस्थित पालकांना मार्गदर्शन केले.
पाचोरा येथील निर्मल इंटरनॅशनल स्कूलमधील पूर्व प्राथमिक विभागातील विदयार्थ्यांचा शाळेच्या प्रांगणात वार्षिक स्नेहसंमेलन “निर्मल उत्सव” पार पडला. यावेळी विद्यार्थ्यांनी उत्साहाने त्यांच्या कलेचे सादरीकरण केले. चिमुरड्यांनी सादर केलेल्या नृत्याविष्काराने उपस्थित जनसमुदाय मंत्रमुग्ध झाला. लहान मुलांच्या नृत्याने सर्व वातावरण आनंदमय झाले होते.
कार्यक्रमाच्या सुरूवातीला संस्थेच्या अध्यक्षा वैशाली सुर्यवंशी, उपाध्यक्षा कमलताई पाटील, सचिव नरेंद्रसिंग सुर्यवंशी आणि अन्य मान्यवरांच्या उपस्थितीत दीपप्रज्ज्वलन करण्यात आले. तसेच सरस्वतीच्या प्रतिमेस माल्यार्पण करून गणेश वंदनाने कार्यक्रमाला सुरूवात झाली.
यावेळी संस्थेच्या उपाध्यक्षा कमलताई पाटील, सचिव नरेंद्रसिंग सुर्यवंशी, निर्मल सिड्सचे सर्व पदाधिकरी, शाळेचे प्राचार्य गणेश राजपूत, उपप्राचार्य प्रदीप सोनवणे, समन्वयक स्नेहल पाटील, प्रशासकीय अधिकारी संतोष पाटील, आदी उपस्थित होते. कार्यक्रमाच्या यशस्वितेसाठी पूर्व प्राथमिक विभागातील सर्व शिक्षक तसेच शिक्षकेतर कर्मचा-यांनी अथक परिश्रम घेतले.
हेही वाचा : ‘ताईंना विधानभवनात पाठवायचंय’, भडगाव येथील मेळाव्यात आदित्य ठाकरे नेमकं काय म्हणाले?
