चंद्रकांत दुसाने, विशेष प्रतिनिधी
नंदुरबार, 6 जून : नंदुरबार लोकसभा मतदारसंघात डॉक्टर विरुद्ध वकील अशी जोरदार रंगलेल्या लढतीत काँग्रेसचे ॲड. गोवाल पाडवी यांनी दोन वेळा खासदार राहिलेल्या भाजपच्या डॉ. हिना गावीत यांचा पराभव केला. पाडवी यांनी गावीत यांचा तब्बल 1 लाखांहून अधिक मतांनी पराभव केला. दरम्यान, गोवाल पाडवी यांनी मतदारसंघातून अवघ्या 31 व्या वर्षी निवडून येत यंदाच्या लोकसभा निवडणुकीत महाराष्ट्रातून सर्वात कमी वयात खासदार बनण्याचा मान मिळवला आहे.
कोण आहेत गोवाल पाडवी? –
नंदुरबार लोकसभा मतदारसंघामध्ये यंदाच्या निवडणुकीत काँग्रेसकडून के. सी पाडवी यांचे पुत्र ॲड. गोवाल पाडवी यांना उमेदवारी देण्यात आली. मतदारसंघातील काँग्रेसचा युवा चेहरा म्हणून गोवाल पाडवी यांच्याकडे पाहिले गेले. यामुळे त्यांनी हिना गावीत यांच्याविरोधात उमेदवारी देण्यात आली. गोवाल पाडवी यांचा ऑगस्ट 1992 मध्ये जन्म झाला. दरम्यान, त्यांनी वकिलीचे शिक्षण घेत असताना मुंबई विद्यापीठातून 2015 साली एलएलबी तर 2017 साली एलएलएम पुर्ण केले. पाडवी सध्या मुंबई उच्च न्यायालयात वकील म्हणून कार्यरत असून ‘सायबर लॉ’मध्ये विशेष प्राविण्य मिळवले आहे. वैद्यकीय क्षेत्राशी निगडित कायद्यांचाही गोवाल पाडवी यांचा अभ्यास आहे.
हिना गावीत यांचा केला पराभव –
नंदुरबार लोकसभा मतदारसंघ हा काँग्रेसचा बालकिल्ला राहिला असताना 2014 साली राज्याचे कॅबीनेट मंत्री डॉ.विजयकुमार गावीत यांच्या कन्या डॉ. हिना गावीत यांनी पहिल्यांदा खासदार म्हणून निवडून येत काँग्रेसला धक्का दिला होता. यानंतर हिना गावीत यांनी सलग दहा वर्ष या मतदारसंघाचे नेतृत्व केले. यावेळी त्यांनी माजी मंत्री के.सी. पाडवी यांचा पराभव केला होता. दरम्यान, यंदाच्या निवडणुकीत माजी मंत्री के.सी. पाडवी यांचेच पुत्र गोवाल पाडवी यांनी हिना गावीत यांचा 1 लाखांपेक्षा अधिक मतांनी पराभव करत वडिलांचा पराभवाचा बदला काढला.
लोकसभा निवडणुकीपूर्वी काँग्रेस नेते राहुल गांधी यांची भारत जोडो न्याय यात्रा नंदुरबारात आली होती. तेव्हापासून या मतदारसंघात काँग्रेसच्या बाजून वातावरण निर्मिती सुरूवात झाली होती. यानंतर प्रचारादरम्यान काँग्रेसने मतदारांच्या मतपरिवर्तनासाठी केलेले प्रयत्न हेच गोवाल पाडवी यांच्या विजयासाठी महत्वाचे ठरले आहेत.
हेही वाचा : Smita Wagh : विजयानंतर स्मिता वाघ Special Interview
