ईसा तडवी, प्रतिनिधी
सातगाव डोंगरी (पाचोरा) : पाचोरा तालुक्यातील सातगाव डोंगरी येथून पत्नीने पतीवर विळ्याने वार करत जखमी केल्याची धक्कादायक घटना समोर आली आहे.
काय आहे संपूर्ण प्रकरण? –
सातगाव डोंगरी येथील रमजान तडवी (वय 36) 9 नोव्हेंबर रोजी संध्याकाळी 4 वाजेच्या सुमारास शेतात कामाला गेले होते. दरम्यान, त्यांना त्यांच्या पत्नीने फोन केला असता रमजान तडवी लागलीच कामा वरुन घरी गेले. तेव्हा घरी पत्नी व त्यांचे माहेरील मंडळी महिलांसह हजर होते. तेव्हा त्यांच्यात घरगुती बोलणी सुरु असतानाच माहेरच्या मंडळींनी रमजान तडवी यांना शिवीगाळ करुन चापटा बुक्क्यांनी मारहाण करण्यास सुरूवात केली.
विळ्याने केला वार –
मारहाणीदरम्यान रमजान तडवी यांच्या हातावर त्यांच्या पत्नीने विळ्याने वार केला. दरम्यान, ते गंभीर जखमी झाले. यामध्ये तडवी यांची आई भांडण सोडवण्यास गेली असता त्यांना देखील मारहाण तसेच शिवीगाळ करण्यात आली. दरम्यान, रमजान तडवी यांच्या हातातून रक्तस्त्राव होऊ लागल्याने ग्रामस्थांनी भांडणात मध्यस्थी करत वाद मिटवला.
पोलीसांत गुन्हा दाखल –
याप्रकरणी पिंपळगाव हरेश्वर पोलीसात रमजान तडवी यांनी याबाबत तक्रार दिली असता पत्नीसह माहेरची मंडळी असे संशयित 4 जणांविरोधात गुन्ह्याची नोंद करण्यात आली आहे. या घटनेचा पुढील तपास पोलीस रवींद्र पाटील हे करीत आहेत.
