मुंबई : भाजप विधीमंडळ पक्षाचे नेते देवेंद्र फडणवीस हे राज्याचे मुख्यमंत्री म्हणून उद्या शपथ घेणार आहेत. तसेच अजित पवार हे उपमुख्यमंत्री म्हणून शपथ घेणार आहेत. मात्र, एकनाथ शिंदे हे देवेंद्र फडणवीसांच्या सरकारमध्ये सहभागी होतील की नाही, हे अद्याप स्पष्ट नाही. याबाबत माध्यमांनी विचारलेल्या प्रश्नावर त्यांनी पुन्हा एकदा सस्पेन्स वाढवला.
काय म्हणाले एकनाथ शिंदे –
महायुतीमध्ये खातेवाटपावरुन नाराजीनाट्य सुरू असल्याची चर्चा आहे. आज महायुतीच्या नेत्यांनी राज्यपालांकडे सत्तास्थापनेचा दावा केला. यानंतर देवेंद्र फडणवीस, अजित पवार आणि एकनाथ शिंदे या तिघांनी माध्यमांशी संवाद साधला. यावेळी एकनाथ शिंदे यांना ते देवेंद्र फडणवीसांच्या कॅबिनेटमध्ये सहभागी होणार का, या प्रश्नावर ते म्हणाले की, संध्याकाळी आम्ही तुम्हाला याबाबत सांगतो. थोडं थांबा. देवेंद्रजी माझ्याकडे आले, तो त्यांच्या मनाचा मोठेपणा आहे. मी त्यांना धन्यवाद देतो. आमच्या सर्व महायुतीच्या आमदारांचाही जो आग्रह आहे, सर्वांना मी धन्यवाद देतो. सगळ्यांचा आदर करतो. त्यामुळे तुम्हाला सांगू.
महायुतीच्या नेत्यांनी केला सत्तास्थापनेचा दावा –
विधानसभा निवडणुकीत महायुतीला मिळालेल्या ऐतिहासिक यशानंतर आता अखेर राज्यात पुन्हा एकदा महायुतीचे सरकार स्थापन होणार आहे. महाराष्ट्राचे मुख्यमंत्री म्हणून देवेंद्र फडणवीस हे उद्या शपथ घेतील, हे आता स्पष्ट झाले आहे. त्यानंतर आता राज्यात सरकार स्थापनेच्या घडामोडींना वेग आला आहे. भाजपच्या नवनिर्वाचित आमदारांकडून आजच देवेंद्र फडणवीस यांची विधीमंडळ पक्षनेते म्हणून निवड करण्यात आली. यानंतर महायुतीच्या सर्व नेत्यांनी आजच राज्यपालांची भेट घेऊन सत्ता स्थापनेचा दावा केला.
यावेळी भाजपच्या विधिमंडळ गटनेत्याची निवड करण्यासाठी गुजरातचे माजी मुख्यमंत्री विजय रूपाणी, केंद्रीय अर्थमंत्री निर्मला यांच्यासह देवेंद्र फडणवीस यांच्यासह एकनाथ शिंदे, अजित पवार, विनोद तावडे, प्रफुल्ल पटेल, यांच्यासह महायुतीचे नेते उपस्थित होते.
देवेंद्र फडणवीसच महाराष्ट्राचे मुख्यमंत्री! पंतप्रधान नरेंद्र मोदींच्या उपस्थितीत उद्या घेणार शपथ
