सोलापूर, 14 ऑगस्ट : सोलापूर जिल्ह्यात सांगोला तालुक्यातील अजनाळे येथून धक्कादायक घटना समोर आली आहे. ट्रॅक्टर ब्लोअरच्या रॉडमध्ये साडीचा पदर अडकल्यामुळे गळफास बसल्याने पतीदेखत पत्नीचा मृत्यू झाला आहे. प्रियांका प्रवीण येलपले (वय २९ वर्ष, रा. अजनाळे, ता. सांगोला) असे मृत महिलेचे नाव आहे.
नेमकी काय आहे घटना –
डाळिंबाच्या झाडाला स्लरी सोडताना म्हणजेच फवारणी करत असताना ट्रॅक्टर ब्लोअरच्या रॉडमध्ये साडीचा पदर अडकला. त्यामुळे गळफास बसल्याने पतीदेखत पत्नीचा मृत्यू झाला आहे. डोळ्यांदेखत पत्नीचा जीव जात असल्याचे पाहून पतीने खूप आरडाओरड केली होती, पण गळफास इतका घट्ट बसला होता की, काही मिनिटात पत्नीचे जागेवरच प्राण गेले. ही घटना रविवार, १३ ऑगस्ट रोजी दुपारी अडीचच्या सुमारास सांगोला तालुक्यातील अजनाळे येथे घडली. दरम्यान, या घटनेमुळे सांगोला तालुक्यात हळहळ व्यक्त केली जात आहे.
साडीचा लागला गळफास –
मिळालेल्या माहितीनुसार, मृत महिलेचा पती प्रवीण येलपले व पत्नी प्रियांका हे दोघे मिळून रविवारी शेतातील डाळिंब बागेत आले. प्रवीण येलपले पुढे बघून ट्रॅक्टर चालवित होते. पत्नी प्रियंका ट्रॅक्टरला जोडलेल्या ब्लोअर युनिटच्या साहाय्याने झाडांना स्लरी ओतत होत्या. दरम्यान, ब्लोअर ढवळणी रॉडला प्रियांकाच्या साडीचा पदर गुंडाळून तिला गळफास लागला आणि ट्रॅक्टर जाम चालू लागला. इतक्यात प्रवीण याने पाठीमागे वळून पाहिले असता प्रियांकाच्या गळ्याला साडीचा गळफास बसल्याचे दिसून आले.
अशी आली घटना लक्षात –
प्रवीण येलपले हे पुढे पाहत ट्रॅक्टर चालवत होते. डाळिंबाच्या रोपांना औषध सोडताना अचानकपणे ट्रॅक्टर जाम झाले. पत्नीचा साडीचा पदर अडकून पत्नी प्रियांका तडफडत होती. गळफास घट्ट बसल्याने प्रियांकाला ओरडता देखील आले नव्हते. दरम्यान, प्रवीण यांनी ताबडतोब ट्रॅक्टर थांबवून प्रियंकाच्या गळ्याला बसलेला साडीचा गळफास काढला व उपचाराकरिता तिला तातडीने सांगोला ग्रामीण रुग्णालयात दाखल केले. डॉक्टरांनी उपचारापूर्वीच तिचा मृत्यू झाल्याचे डॉक्टरांनी सांगितले.
