चोपडा, 17 जून : चोपडा तालुक्यातून धक्कादायक घटना समोर आलीय. गावातीलच तीन जणांच्या मानसिक छळाला कंटाळून 17 वर्षीय तरुणाने आत्महत्या केल्याची घडना घडली. ही हृद्रयदावक घटना चोपडा तालुक्यातील घुमावल येथे रविवारी पहाटे घडली. दरम्यान, या त्रास देणाऱ्या तीनही जणांविरुद्ध चोपडा ग्रामीण पोलिसात गुन्हा दाखल करुन त्यांना तत्काळ अटक करण्यात आली आहे. मंगेश रेवानंद पाटील (17) असे मृत तरुणाचे नाव आहे. तर महेंद्र एकनाथ पाटील (38), मनोज पंढरीनाथ पाटील (42) आणि पवन मगन पाटील (२९, सर्व रा. घुमावल बुद्रुक) अशी अटकेतील संशयितांची नावे आहेत.
मानसिक त्रासातून गळफास घेत केली आत्महत्या –
मिळालेल्या माहितीनुसार, मंगेश यास गावातील वरील तीन जणांनी वेळोवेळी मानसिक त्रास दिला. चार दिवसांपूर्वी चोपडा-घुमावल रस्त्यावर त्यांनी मंगेशशी वाद घातला होता. या पार्श्वभूमीतून मानसिक त्रासातून गळफास घेऊन मंगेशने आपले जीवन संपवले. याप्रकरणी मंगेशचे काका व माजी सरपंच वसंतराव पाटील यांनी चोपडा पोलिसात तक्रार दिली. या तक्राररीत गावातील ग्रामपंचायत सरपंच पदाचा पूर्वीचा वाद असल्याचे म्हटले आहे.
तरूणाने आत्महत्येपुर्वी लिहिली सुसाइड नोट –
मृत तरूण मंगेश पाटीलने आत्महत्या करण्यापूर्वी सुसाइड नोट लिहून ठेवली होती. त्यात त्याने आई-वडील यांची माफी मागतली आणि महेंद्र एकनाथ पाटील, मनोज पंढरीनाथ पाटील, पवन मगन पाटील (सर्व रा. घुमावल ता. चोपडा) यांच्या धमक्यांना, त्रासाला कंटाळत आपण आत्महत्या करीत असल्याचे सुसाईड नोटमध्ये लिहून ठेवले आहे.
“……तर आज मंगेश जिवंत असता!” –
तसेच यापूर्वीही या तरुणांनी मंगेशला मारहाण केली व जीवे ठार मारण्याची धमकी दिल्याची लेखी तक्रार ग्रामीण पोलिसात केली होती. दरम्यान, पोलिसांनी त्यावेळी संशयितांना समज देऊन सोडले होते. त्यांना शिक्षा झाली असती, तर आज मंगेश जिवंत असता, अशी खंत त्यांनी व्यक्त केली. अधिक तपास पोलिस निरीक्षक कावेरी कमलाकर करीत आहेत.
हेही वाचा : विद्यार्थ्यांसाठी आनंदाची बातमी! शाळा-महाविद्यालयातच मिळणार आता एसटीचा पास, काय महामंडळाची विशेष मोहीम?
