ईसा तडवी, प्रतिनिधी
पाचोरा, 19 मे : जळगाव जिल्ह्यात अपघाताच्या घटनांमध्ये वाढ होत असतानाच पाचोरा तालुक्यातून अपघात झाल्याची धक्कादायक घटना आज घडली. यामध्ये पाचोरा येथील अंतुर्ली फाट्याजवळ झालेल्या अपघातात तरूणाचा जागीच मृत्यू झाल्याची माहिती समोर आली आहे. यशवंत माळी (रा. मांदुरणे ता.चाळीसगाव) असे मृत तरूणाचे नाव आहे.
काय आहे संपूर्ण बातमी? –
मिळालेल्या माहितीनुसार, पाचोरा शहरातील अंतुर्ली फाट्याजवळ चारचाकीने यशवंतच्या मोटारसायकलला दिलेल्या धडकेत यशवंत हा जागीच ठार झाला. हा अपघात आज दुपारी 3.30 वाजेच्या सुमारास घडला. अपघातात मृत झालेला तरूण फायनान्स कंपनीमध्ये काम करत होता. दरम्यान, घटनेची माहिती मिळताच रुग्णवाहिका चालक निळू भाऊ यांचे मदतीने मृतदेह पाचोरा ग्रामीण रुग्णालय येथे दाखल करण्यात आला. याप्रकरणी पाचोरा पोलिसांत गुन्हा दाखल करण्याचे काम सुरू होते.
चार दिवसांपुर्वीच पाचोऱ्यात झाला होता अपघात –
पाचोरा येथील जारगाव चौफलीवर जळगावकडे जाताना ट्रक आणि मोटरसायकल यामध्ये अपघात झाल्याची घटना 15 मे रोजी घडली होती. या अपघातात पती समोर पत्नी जागीच ठार झाली. दरम्यान, याप्रकरणी ट्रक चालकाविरूद्ध गुन्हा दाखल करण्यात आला. दरम्यान, गेल्या काही दिवसांमध्ये अपघाताच्या घटनांमध्ये वाढ होत असल्याचे दिसून येत आहे.
हेही वाचा : “तेंडुलकरा तुझा निषेध असो! आतातरी जागा हो…”, मास्टर ब्लास्टरवर बच्चू कडू संतापले, नेमकं काय घडलं?
