ईसा तडवी, प्रतिनिधी
पाचोरा, 14 मार्च: पाचोरा तालुक्यातील वरसाडे तांडा येथे बेपत्ता झालेल्या तरुणाचा खून झाल्याचा धक्कादायक प्रकार उघडकीस आला असून या प्रकरणी पती-पत्नीला पोलिसांनी अटक केली आहे. प्रेमसंबंधातून निर्माण झालेल्या वादातून हा खून केल्याची कबुली आरोपींनी दिली आहे. संजय परशुराम जाधव आणि सोनाली संजय जाधव (रा. वरसाडे तांडा) असे अटक केलेल्या आरोपी पती-पत्नीचे नावे असून पाचोरा न्यायालयाने आरोपींना पाच दिवसांची पोलीस कोठडी सुनावली आहे.
नेमकं काय घडलं? –
मिळालेल्या प्राथमिक माहितीनुसार, पिंपळगाव हरे पोलीस स्टेशन हद्दीतील वरसाडे तांडा क्रमांक 3 येथील संजय भिमा राठोड (वय ३३) यांनी २६ फेब्रुवारी रोजी आपला भाऊ विजय भिमा राठोड (वय २५) हा २४ फेब्रुवारीच्या रात्री घरातून कोणालाही न सांगता निघून गेल्याची तक्रार दिली होती. त्यानुसार पिंपळगाव हरे पोलीस ठाण्यात मिसिंग क्रमांक १५/२०२६ नोंदविण्यात आला होता.
यानंतर पिंपळगाव पोलीस स्टेशनच्या सहायक पोलीस निरीक्षक कल्याणी वर्मा आणि त्यांच्या पथकाने सखोल तपासास सुरूवात केली. या तपासादरम्यान तांत्रिक माहितीच्या आधारे संजय परशुराम जाधव याची चौकशी केली. सुरुवातीला आरोपीने उडवाउडवीची उत्तरे दिली; मात्र पोलीसी खाक्या दाखविताच त्याने गुन्ह्याची कबुली दिली.
पती-पत्नीने मिळून प्रियकराला संपवलं –
आरोपी संजय जाधव याची पत्नी सोनाली जाधव हिचे आणि विजय राठोड यांचे प्रेमसंबंध होते. या संबंधातून विजय राठोड याने त्याच्या मोबाईलमध्ये सोनालीचे अश्लील व्हिडिओ काढून तिला धमकावत होता. याबाबत माहिती मिळाल्यानंतर संतप्त झालेल्या संजय जाधवने पत्नी सोनालीच्या मदतीने विजय राठोडचा खून करून मृतदेहाची विल्हेवाट लावल्याचे तपासात निष्पन्न झाले.
या प्रकरणी पोलिसांनी दोन्ही आरोपींना अटक केली असून पाचोरा न्यायालयाने त्यांना पाच दिवसांची पोलीस कोठडी सुनावली आहे. या गुन्ह्याचा पुढील तपास सहाय्यक पोलीस निरीक्षक कल्याणी वर्मा करीत आहेत.
यांनी केली कारवाई –
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर (पवार), उपविभागीय पोलीस अधिकारी बापू रोहोम यांच्या मार्गदर्शनाखाली सहायक पोलीस निरीक्षक कल्याणी वर्मा तसेच पोलीस उपनिरीक्षक विठ्ठल पवार, पोहेकॉ किरण ब्राम्हणे, पोहेकॉ अतुल पवार, पोहेकॉ अभिजित निकम, पोना राहुल बेहरे, पोना पांडुरंग गोरबंजार, पोकॉ अमोल पाटील, पोकॉ नामदेव इंगळे, पोकॉ भारत पाटील, पोना दिपक अहिरे, पोकॉ सागर पाटील यांनी केली.
