नंदुरबार : गेल्या काही दिवसात आर्थिक फसवणुकीच्या घटना समोर येत आहेत. वेगवेगळ्या प्रकारे मोठ्या प्रमाणात अनेकांची आर्थिक फसवणूक केली जात असल्याच्या तक्रारी येत आहेत. यातच आता आणखी एक धक्कादायक घटना समोर आली आहे. नंदुरबार येथील 20 वर्षीय तरुणाची साडेचार लाख रुपयात फसवणूक झाली आहे.
मार्टिन रीजो जॉन्सन रा. गणेश नगर, धुळे चौफुली असे फसवणूक झालेल्या तरुणाचे नाव आहे. उत्तर भारतातील विविध पर्यटनस्थळांचे बुकींग करण्याचा बहाणा करुन या 20 वर्षीय तरुणाची ट्रॅव्हल्स कंपनीकडून साडेचार लाख रुपयात फसवणूक करण्यात आली आहे. 15 नोव्हेंबर 2024 ते 25 जानेवारी 2025 दरम्यान हा प्रकार घडला आहे.
नेमकं काय घडलं –
मार्टिन याने नोव्हेंबर 2024 मध्ये ओव्ही टूर्स अंड ट्रॅव्हल्स कंपनीला संपर्क करुन दिल्ली, शिमला, डलहौसी, मनाली आणि अमृतसर याठिकाणी ट्रिप आयोजित केली होती. यासाठी त्याने कंपनीचे मालक असलेले ओंकार मारुती किर व अक्षय मधुकर नेरुरकर या दोघांसोबत संपर्क साधून वेळोवेळी 4 लाख 53 हजार 999 रुपये पाठवले होते.
यानंतर ट्रॅव्हल्स कंपनीकडून मार्टिन नावाच्या या तरुणाला मोबाईलवर तिकिटे पाठवण्यात आली होती. मात्र, संबधित ठिकाणी कोणतेही बुर्कीग नसल्याचे उघडकीस आल्यानंतर युवकाने पाठपुरावा केला होता. परंतू संशयितांनी त्याला पैसे परत केले नाही आणि आपली फसवणूक झाल्याचे त्याच्या लक्षात आले.
त्यामुळे मार्टिन जॉनसन याने सोमवारी नंदुरबार शहर पोलीस ठाण्यात फिर्याद दिली. यावरुन ओंकार मारुती किर व अक्षय मधुकर नेरुरकर या दोघांविरोधात 4 लाख 53 हजार रुपयांची फसवणूक केल्याचा गुन्हा दाखल करण्यात आला आहे. याप्रकरणी पुढील तपास पोलीस निरीक्षक अमितकुमार मनेळ करत आहेत. दरम्यान, या घटनेने पुन्हा एकदा आर्थिक फसवणुकीचा प्रकार समोर आला आहे. नागरिकांनी कुठलीही आर्थिक गुंतवणूक करताना काळजी घेण्याचे आवाहन पोलिसांनी केले आहे.
हेही वाचा – नंदुरबार रेल्वे स्थानकातील ‘त्या’ तरुणाच्या हत्त्याप्रकरणी 9 जणांना अटक, नेमकी काय प्रकरण?
