सौंदाळा (अहमदनगर), 30 नोव्हेंबर : अहमदनगर जिल्ह्यातील नेवासा तालुक्यातील सौंदाळा येथील ग्रामपंचायतीने समाजहिताचा निर्णय घेतलाय. सौंदाळ्यात आयोजित केलेल्या ग्रामसभेने आई व बहीणीच्या नावाने शिव्या देण्यास बंदी घातली आहे. तरीही जो शिव्या देईल त्याच्यावर ग्रामपंचायतकडून 500 रुपये दंड सक्तीने आकारण्यात येणार असल्याची माहिती सरपंच शरद आरगडे यांनी दिली आहे.
सौंदाळा ग्रामपंचायतीत शिव्याबंदीसह समाजहिताचे ठराव –
सौंदाळाच्या ग्रामसभेत गावात शिव्याबंदीचा हा निर्णय घेण्यात आला असून शिव्या देण्यावर बंदी घालून महिला भगिनींचा सन्मान करण्यात येत असल्याची भावना सरपंच शरद आरगडे यांनी व्यक्त केली आहे. यावेळी बालकामगार बंदीचा ठराव घेण्यात आला असून बालकामगार मुक्त गाव करण्यासाठी बालकामगार दाखवा एक हजार रुपये मिळवा, असे स्लोगन ठरवून बालकामगार निदर्शनास आल्यास त्याचा फोटो काढून ग्रामपंचायतीकडे आणून द्यावा त्या व्यक्तीस एक हजार रुपये बक्षीस दिले जाईल, असा ठराव ग्रामसभेत मांडण्यात आला आहे.
तसेच गावामध्ये बालविवाह शंभर टक्के बंदी करण्यात आलेला आहे. गावात कुणीही बालविवाह करू नये आणि बालविवाह केल्यास कायदेशीर कारवाई करण्यात येईल, असाही ठराव ग्रामसभेत मंजूर करण्यात आला आहे. सोशल मीडियाच्या मोबाईलमुळे शालेय विद्यार्थी अभ्यास करत नसल्याचे निदर्शनास आल्याने यापुढे संध्याकाळी 7 ते 9 यावेळेत घरातील शालेय विद्यार्थ्याकडे मोबाईल द्यायचा नाही, असाही ठराव ग्रामसभेत घेण्यात आला.
सौंदाळा ग्रामपंचायतीने ग्रामसभेत केलेले ठराव –
- गावात शिव्या देण्यावर बंदी.
- बालकामगारवर बंदी.
- बालविवाहांवर शंभर टक्के बंदी.
- कुटुंबियांकडून संध्याकाळी 7 ते 9 यावेळेत शालेय विद्यार्थ्यांना मोबाईलवर निर्बंध.
दरम्यान, या सर्व ठरावांची सूचना सरपंच शरद आरगडे यांनी मांडली आणि अनुमोदन गणेश आरगडे यांनी दिले. यावेळी उपसरपंच कोमल आरगडे, सदस्य मंगल ज्ञानदेव आरगडे, छाया मिनीनाथ आरगडे, भीमराज आढागळे, सुधीर आरगडे, बाळासाहेब आरगडे, चंद्रकांत आरगडे, मंजू आढागळे, माजी सरपंच प्रियंका आरगडे, उषा बोधक, मंगल बोधक, रंजना बोधक, अश्विनी आढागळे, कावेरी आढागळे, ग्रामसेवक प्रतिभा पिसोटे यांच्यासह मोठ्या संख्येने महिलांसह पुरूष आदी उपस्थित होते.
हेही वाचा : “….ईव्हीएमसाठी एवढा अट्टहास का?”, विधानसभा निवडणुकीच्या निकालाबाबत रोहिणी खडसे काय म्हणाल्या?
