जळगाव – जळगाव जिल्ह्यातील तलाठ्यावर वाळू माफियांनी हल्ला केल्याची घटना घडली. या घटनेचे गांभीर्य लक्षात घेता जिल्हा पोलीस अधीक्षकांनी आरोपींना अटक करण्याचे आदेश दिले होते. यानंतर या प्रकरणातील आरोपींना पोलिसांनी अटक केली. तसेच जिल्हाधिकारी आयुष प्रसाद यांनी यांनी तातडीने घटनास्थळी भेट देत वाळू माफियांविरोधात प्रशासन अधिक कठोर पावले उचलणार असल्याचे सांगितले.
काय आहे संपूर्ण घटना –
जळगाव जिल्ह्याच्या धरणगाव तालुक्यातील चांदसर येथे गिरणा नदीतून अवैध वाळू उपसा आणि वाहतूक रोखण्यासाठी गेलेल्या महसूल विभागाच्या पथकावर गुरुवारी मध्यरात्री अडीचच्या सुमारास वाळू माफियांनी प्राणघातक हल्ला केला होता. या हल्ल्यात आरोपी आबा ईश्वर कोळी, योगेश ईश्वर कोळी, दिनेश सोमा कोळी, गणेश सोमा कोळी यांनी तलाठी दत्तात्रय पाटील यांच्यावर हल्ला चढवला. यात त्यांच्या पायावर फावड्याने वार केल्यामुळे ते फॅक्चर झाले आहे.
या घटनेत तलाठी दत्तात्रय पाटील गंभीर जखमी झाले असून त्यांच्यावर सध्या उपचार सुरु आहेत. याप्रकरणी नायब तहसीलदार संदीप मोरे यांनी पोलिसात तक्रार दाखल केली. यानंतर आरोपींवर कलम 109, 132, 121(2), 303(2) 112(2), 189(2), 191, 190 प्रमाणे गुन्ह्यांची नोंद करण्यात आली आहे.
आरोपींना तात्काळ अटक करण्याच्या सुचना –
गुन्हा दाखल झाल्यानंतर जिल्हा पोलीस अधिक्षक मा. महेश्वर रेड्डी यांनी स्थानिक गुन्हे शाखा जळगाव व पाळधी दुरक्षेत्र धरणगाव पोलीसांनी 24 तासाच्या आत गुन्ह्यातील आरोपी आबा ईश्वर कोळी, योगेश ईश्वर कोळी, दिनेश सोमा कोळी, गणेश सोमा कोळी यांना अटक करण्यात आली आहे. यासोबतच गुन्ह्यात वापरलेले 2 ट्रॅक्टर सुद्धा जप्त करण्यात आले आहे.
प्रशासनाने या घटनेची गंभीर दखल घेतली आहे. जिल्हाधिकारी आयुष प्रसाद यांनी तातडीने घटनास्थळी भेट देत वाळू माफियांविरोधात प्रशासन अधिक कठोर पावले उचलणार असल्याचे सांगितले. तसेच जिल्ह्यातील सर्व मंत्री, विभागीय आयुक्त यांनी या घटनेची गंभीर दखल घेत योग्य ती कडक कारवाई करण्याचे आदेश दिले आहेत.
