देहू (पुणे), 10 फेब्रुवारी : संत तुकाराम महाराज यांचे 11 वे वंशज शिरीष महाराज मोरे यांनी कर्जामुळे आत्महत्या केल्याची घडना घडली होती. स्वतःवर असलेल्या 32 लाखांच्या कर्जामुळे हा टोकाचा निर्णय घेत असल्याचे शिरीष महाराजांनी सुसाईड नोट्समध्ये लिहिले होते. दरम्यान, राज्याचे उपमुख्यमंत्री एकनाथ शिंदे यांनी आपल्या वाढदिवसानिमित्त त्यांनी मोरे कुटुंबीयांना 32 लाख रुपयांची आर्थिक मदत जाहीर केली आहे.
उपमुख्यमंत्री एकनाथ शिंदेंचा मोरे कुटुंबियांना मदतीचा हात –
शिंदेंच्या शिवेसेनेचे आमदार विजय शिवतारे यांनी काल शिरीष महाराज मोरे यांच्या कुटुंबियांची सांत्वनपर भेट घेतली उपमुख्यमंत्री एकनाथ शिंदे यांनी मोरे कुटुंबीयांना 32 लाख रुपयांची जाहीर केलेल्या मदतीची रक्कम मोरे कुटुंबीयांकडे सुपूर्द केली. दरम्यान, एकनाथ शिंदेंनी घेतलेल्या निर्णयामुळे दिवंगत शिरीष महाराज मोरे यांच्या आत्महत्याने धक्का बसलेल्या त्यांच्या कुटुंबियांना दिलासा मिळाला आहे.
मोरे कुटुंबियांची भेट घेतल्यानंतर विजय शिवतारे यांनी माध्यमांना माहिती देताना सांगितले की, शिरीष महाराज मोरेंच्या आत्महत्या प्रकरणाची सुसाईट नोट वाचल्यानंतर मला प्रचंड दुःख झाले होते. यानंतर राज्याचे उपमुख्यमंत्री एकनाथ शिंदे यांना याबाबत मी माहिती दिल्यानंतर त्यांनी देखील दुःख व्यक्त केले होते. तसेच त्यांच्यावर असलेल्या कर्जाबाबत त्यांनी माहिती दिली असती तर मदत करता आली असती.
दरम्यान, माझ्या मृत्यू पश्चात माझ्यासाठी समाजाने पुढे यावे, असे शिरीष महाराज मोरे यांना सुसाईट नोट्समध्ये सांगितल्यानुसार आणि त्यांच्या आत्म्यास शांती मिळावी. म्हणून एकनाथ शिंदे यांनी आपल्या वाढदिवसानिमित्त शिरीष मोरे यांच्या मदतीची रक्कम त्यांच्या कुटुंबियांना विनम्रतेने अर्पण करण्याचे मला सांगितले होते. त्यानुसार मोरे महाराजांच्या कुटुंबियांची सांत्वनपर भेट घेत ती रक्कम त्यांना विनम्रतेने अर्पण केली, अशी माहिती विजय शिवतारे यांनी दिली.
सुसाईड नोट्समधून कर्जाची दिली होती माहिती –
शिरीष महाराज मोरे यांनी राहत्या घरी गळफास घेत आत्महत्या केल्याची घटना 5 फेब्रुवारी रोजी उघडकीस आली. त्यांच्या आत्महत्यानंतर त्यांनी लिहिलेल्या सुसाईड नोट्समधून त्यांच्यावर असलेल्या कर्जाची माहिती समोर आली होती. माझ्यावर कर्जाचा डोंगर असून 32 लाखांचे कर्ज असल्याची माहिती देत आपल्या पश्चात आपल्या कुटुंबाला आर्थिक मदत करण्याची विनंती शिरीष महाराज मोरे यांनी मृत्यूपूर्वी लिहिलेल्या पत्रातून मित्रमंडळींना केली होती.
