पाचोरा, 13 एप्रिल : येत्या 28 एप्रिल रोजी पाचोरा-भडगाव कृषी उत्पन्न बाजार समितीची निवडणूक होत आहे. राज्यात शिवेसना (शिंदे गट) आणि भाजप यांची युती असून हे दोन्ही पक्ष सत्तेत आहेत. मात्र, पाचोरा-भडगाव कृषी उत्पन्न बाजार समितीची निवडणूक भारतीय जनता पार्टीच्या वतीने संपूर्णपणे स्वबळावर लढवणार आहे. भाजपच्या वतीने या निवडणुकीसाठी बहुसंख्य उमेदवारांनी नामनिर्देशन दाखल केले आहेत. तसेच या निवडणुकीत भाजपसोबत काही समविचारी उमेदवार निवडणूक लढणार आहे, असे भाजपकडून स्पष्ट करण्यात आले.
ही निवडणूक भाजपा तालुकाध्यक्ष अमोल शिंदे यांच्या मार्गदर्शनाखाली आणि कृषी उत्पन्न बाजार समितीचे मा. सभापती सतीष शिंदे यांच्या नेतृत्त्वाखाली लढवली जाणार आहे. या निवडणुकीच्या निमित्ताने उमेदवारी अर्ज दाखल केलेल्या उमेदवारांनी आणि भारतीय जनता पार्टीच्या कार्यकर्त्यांनी मतदारांशी आपला स्वतंत्र संपर्क सुरू केला आहे, असे भाजपच्या वतीने स्पष्ट करण्यात आले.
आपण ही निवडणूक स्वबळावर लढणार आहोत. तरी आमदारांनी केलेल्या कुठल्याही प्रकारच्या अफवांना मतदारांनी व कार्यकर्त्यांनी बळी पडु नये. तसेच भाजपा पाचोरा आणि भडगाव तालुक्यातील पदाधिकारी, कार्यकर्ते एकसंघ असुन या निवडणुकीसाठी ताकदीने कामाला लागले आहे, असे तालुकाध्यक्ष अमोल शिंदे यांनी प्रसिद्धी पत्रकात म्हटले आहे.
आमदारांच्या पायाखालची वाळू सरकल्यामुळे आमदार दुसऱ्या पक्षांचे प्रवक्तेपद बळजबरीने उसने भाड्याने घेतल्यासारखे पत्रकार परिषदा घेत फिरत आहेत. त्यांची स्वबळावर निवडणुका लढवण्याची ताकत पूर्णपणे खचली असल्याने आमदारांना व त्याच्या उर्वरित उमेदवारांना कुठलाही आत्मविश्वास उरलेला दिसत नाही.
ज्या आमदारांना पूर्वी भाजप हा पक्ष नकोसा होता, भाजपच्या नावाने आतापर्यंत ते आकांड तांडव करत होते. भाजप कार्यकर्त्यांना चुकीच्या पद्धतीने त्रास देत होते, त्यांना आज अचानक भाजपची गरज का पडतेय? त्यांना भाजपची आठवण येण्याची उपरती का झाली? असा प्रश्न भाजप भडगाव तालुकाध्यक्ष अमोल पाटील यांनी प्रसिध्दी पत्रकात उपस्थित केला आहे.
येत्या 20 तारखेला माघारीनंतर भाजप आणि समविचारी उमेदवारांच्या प्रचारांत भाजपचे पाचोरा व भडगाव तालुक्यातील सर्व कार्यकर्ते पूर्णपणे स्वतःला झोकून देऊन काम करतील, असे शहराध्यक्ष रमेश वाणी यांनी म्हटले. तसेच आमदारांनी मेळाव्यात व पत्रकार परिषदेत केलेल्या आरोपांना योग्य त्या ठिकाणी पुराव्या निशी उत्तर देऊन त्यांचा खरा चेहरा मतदारांसमोर उघडा करू, असेही तालुकाध्यक्ष अमोल शिंदे यांनी सदर पत्रकात म्हटले.
