अक्कलकुवा (नंदूरबार) : विधानसभा निवडणुकीत महायुतीला दणदणीत असा विजय मिळाल्यानंतर उपमुख्यमंत्री एकनाथ शिंदे हे येत्या सोमवारी 31 मार्च रोजी खान्देशच्या दौऱ्यावर येत आहेत. खान्देशातील नंदुरबार जिल्ह्यातील अक्कलकुवा येथे एकनाथ शिंदे यांच्या जाहीर सभेचे आयोजन करण्यात आले आहे, त्यामुळे या सभेला मोठ्या संख्येने उपस्थित राहावे, असे आवाहन विधानपरिषद आमदार चंद्रकांत रघुवंशी आणि अक्कलकुवा विधानसभा मतदारसंघाचे आमदार आमश्या पाडवी यांनी संयुक्त पत्रकार परिषदेत केले.
आमश्या पाडवी यांना अक्कलकुवा मतदारसंघातून निवडून द्या, मी चंद्रकांत रघुवंशी यांना विधानपरिषद आमदार बनवेन, असे आश्वासन उपमुख्यमंत्री तथा शिवसेना पक्षप्रमुख एकनाथ शिंदे यांनी मतदारसंघाच्या जनतेला दिले होते. अखेर विधानसभा निवडणुकीत अक्कलकुवा मतदारसंघातून आमश्या पाडवी यांनी विजय मिळवला. यानंतर त्यांची विधानपरिषदेची जागा रिक्त झाली होती. त्यामुळे एकनाथ शिंदे यांनी दिलेला शब्द पाळत शिंदे गटाचे नेते चंद्रकांत रघुवंशी यांना विधानपरिषदेची आमदारकी दिली.
यानंतर आता अक्कलकुवा येथे सोमवारी 31 मार्च रोजी जाहीर आभार सभेचे आयोजन करण्यात आले असून या सभेला उपमुख्यमंत्री एकनाथ शिंदे यांची प्रमुख उपस्थिती राहणार आहे. नंदुरबार जिल्ह्याच्या जनतेचे आभार मानण्यासाठी उपमुख्यमंत्री एकनाथ शिंदे येत आहेत. त्यामुळे या सभेला मोठ्या संख्येने उपस्थित राहावे, असे आवाहन विधानपरिषद आमदार चंद्रकांत रघुवंशी आणि अक्कलकुवा विधानसभा मतदारसंघाचे आमदार आमश्या पाडवी यांनी संयुक्त पत्रकार परिषदेत केले.
दरम्यान, एकनाथ शिंदे यांच्या या जाहीर सभेसाठी जय्यत तयारी सुरू असून या कार्यक्रमाची माहिती देण्यासाठी आमदार चंद्रकांत रघुवंशी आणि आमदार आमश्या पाडवी आज संयुक्त पत्रकार परिषदेचे आयोजन करण्यात आले होते.
