ईसा तडवी, प्रतिनिधी
पाचोरा, 14 सप्टेंबर : पाचोरा- तालुक्यात राज्य शासनाच्या वतीने “सेवा पंधरवाडा” मोठ्या उत्साहात व नियोजनबद्ध पद्धतीने साजरा करण्यात येणार आहे. या कालावधीत शासनाच्या विविध कल्याणकारी योजना, जनजागृती उपक्रम आणि नागरिकांच्या सोयीसाठी आवश्यक सेवा कार्यक्रम राबविण्यात येणार आहेत. या माध्यमातून शासनाच्या धोरणांचा प्रत्यक्ष लाभ जनतेपर्यंत पोहोचविणे, प्रशासनाबद्दल नागरिकांचा विश्वास दृढ करणे आणि सर्वसामान्यांच्या समस्या त्वरित निकाली काढणे हा प्रमुख उद्देश आहे.
तहसील प्रशासनाच्या माहितीनुसार, सेवा पंधरवाड्यात विशेषतः शासन योजनांचा लाभ वितरण, प्रलंबित अर्जांचे निकालीकरण, अतिक्रमण हटविण्याची मोहीम तसेच महसूल कायदा (MLRC) अंतर्गत प्रलंबित कामांचा तातडीने निपटारा करण्यावर भर दिला जाणार आहे. शासनाने दिलेल्या सूचनांप्रमाणे, प्रशासन अधिक सेवा भावनेने कार्य करेल आणि नागरिकांना योजनांचा योग्य व पारदर्शक लाभ मिळावा यासाठी सर्व स्तरांवर दक्षता घेण्यात येईल. या उपक्रमात सर्व नागरिकांनी उत्स्फूर्तपणे सहभाग नोंदवावा, असे आवाहन तहसील प्रशासनामार्फत करण्यात आले आहे.
सेवा पंधरवाड्यातील एक महत्त्वाचा उपक्रम म्हणजे थकबाकीमुक्ती मोहीम. या अंतर्गत विविध थकबाकीदारांना नोटिसा बजावण्यात आल्या असून, लोकअदालतीच्या माध्यमातून तोडगा काढण्याची प्रक्रिया सुरू झाली आहे. पाचोरा येथील कायलयामार्फत एकूण 253 थकबाकीदारांना नोटिसा बजावण्यात आल्या होत्या. त्यातील 92 थकबाकीदारांनी पुढाकार घेत तात्काळ प्रतिसाद दिला आणि दिनांक 13 सप्टेंबर 2025 रोजी एकूण 1,59,381 रुपयांची वसुली करण्यात आली. या मोहिमेमुळे शासनाच्या महसुलात वाढ होण्यासोबतच थकबाकीदारांनाही दिलासा मिळाला आहे.
सेवा पंधरवाड्यादरम्यान नागरिकांच्या दैनंदिन जीवनाशी निगडीत असलेल्या अनेक समस्यांवर उपाययोजना करण्यात येणार आहे. त्यामध्ये “जीवंत 7/12” नोंदीतील मृत व्यक्तींची नावे वगळणे, वारस दाखल करणे, तसेच विविध प्रलंबित प्रकरणांचा निपटारा करून अर्ज निकाली काढण्याचा समावेश आहे. यासाठी 5 सप्टेंबरपर्यंत दाखल झालेले सर्व अर्ज 2 ऑक्टोबरपूर्वी निकाली काढण्याचे नियोजन करण्यात आले आहे. तसेच, जीवंत रेशनकार्डामधील अपात्र व मृत व्यक्तींची नावे वगळणे, पात्र लाभार्थ्यांची नावे समाविष्ट करणे यासंबंधी पडताळणीही 2 ऑक्टोबरपूर्वी पूर्ण करण्याचा प्रशासनाचा मानस आहे. यामुळे अनेक कुटुंबांना योग्य हक्क व लाभ मिळणार आहेत.
शेतकऱ्यांच्या हितासाठी ‘शेतसुलभ योजना’ या अंतर्गत तुकडेबंदी कायद्यानुसार सुनावणी घेण्यात येणार आहे. तसेच, शेतमालाशी संबंधित 7/12 नोंदी अद्ययावत करण्याचे काम प्राधान्याने हाती घेतले जाणार आहे. याशिवाय, पानंद रस्ते, जमिनीवरील मोजणी क्रमांक (1F), ग्रामसभांमधून मिळणाऱ्या नोंदी यांचा तातडीने निपटारा होणार आहे. अतिक्रमण हटविणे हाही या मोहिमेतील एक महत्त्वाचा भाग असून, दफनभूमी व मशानभूमीवरील अतिक्रमण हटविण्यासाठी आवश्यक ती पावले उचलली जाणार आहेत. तसेच DPDC ताब्यातील प्रलंबित कामे 2 ऑक्टोबरपूर्वी पूर्ण करण्याचा निर्धार प्रशासनाने व्यक्त केला आहे.
सेवा पंधरवाड्याच्या माध्यमातून जनतेपर्यंत थेट पोहोचण्यासाठी ‘महासमाधान शिबिरे’ ही विशेष मोहीम हाती घेण्यात आली आहे. पाचोरा तालुक्यात दोन महासमाधान शिबिरे आयोजित करण्यात येणार आहेत. या शिबिरांत नागरिकांच्या विविध तक्रारी, अर्ज, व मागण्या प्रत्यक्षात स्वीकारून त्यांचे त्वरित निपटारे करण्याचा प्रयत्न होईल. अशा प्रकारच्या शिबिरांना मोठा प्रतिसाद मिळण्याची शक्यता व्यक्त केली जात आहे. शेतकरी अपघात विमा योजनेअंतर्गत पात्र कुटुंबांना शासनाच्या विविध सवलती व लाभ त्वरित मिळावेत यासाठी विशेष प्रयत्न होणार आहेत.
याशिवाय, महाविद्यालयीन शिबिरांतून विद्यार्थ्यांना शैक्षणिक प्रमाणपत्रे वितरित करण्याची कार्यवाही होईल. MLRC कायद्याच्या कलम 29 व 44 नुसार वगैरे ते वगैरे 2 पासून वगैरे ते वगैरे 1 या जमिनींच्या वर्गांतराचा निपटारा होईल. सामाजिक आणि आर्थिकदृष्ट्या दुर्बल घटकांसाठी शासनाच्या समाजकल्याण योजनांनुसार (मुं. 11) तातडीने कारवाई करून लाभ देण्याचे नियोजन आखण्यात आले आहे. तहसील प्रशासनाने स्पष्ट केले आहे की, सेवा पंधरवाड्याचा खरा उद्देश केवळ औपचारिकता नसून शासन-जनता यांच्यातील विश्वास दृढ करणे हा आहे.
नागरिकांनी शासनाच्या योजनांविषयी अधिक माहिती मिळवावी, त्यांचा लाभ घ्यावा आणि शासन यंत्रणेशी थेट संपर्क साधावा यासाठी हा उपक्रम उपयुक्त ठरेल. नागरिकांनी स्वतःहून पुढाकार घेऊन आपल्या प्रलंबित अर्जांचा पाठपुरावा करावा, विविध शिबिरांत सहभाग घ्यावा आणि शासनाने दिलेल्या सवलती, सेवा व योजनांचा लाभ वेळेवर घ्यावा, असे आवाहन करण्यात आले आहे. पाचोरा तालुक्यातील सेवा पंधरवाडा हा केवळ प्रशासनाचा उपक्रम नसून तो एक सामाजिक चळवळ म्हणून उभा राहत आहे. नागरिकांच्या सहभागामुळे या उपक्रमाला खरी यशस्वीता प्राप्त होईल. शासनाच्या सेवा, योजना आणि अधिकार प्रत्यक्षात जनतेपर्यंत पोहोचविण्यासाठी हा पंधरवडा एक महत्त्वपूर्ण पाऊल ठरणार आहे.
हेही वाचा : Minister Jaykumar Rawal : कृषी विकासाला प्राधान्य देणारे शासन – पणन मंत्री जयकुमार रावल
