मुंबई, 1 ऑक्टोबर : दिवाळीच्या पार्श्वभूमीवर एसटी प्रवाशांना मोठा दिलासा मिळाला आहे. महाराष्ट्र राज्य मार्ग परिवहन महामंडळाने (MSRTC) जाहीर केलेली 10 टक्के हंगामी भाडेवाढ अखेर रद्द करण्यात आली आहे. उपमुख्यमंत्री एकनाथ शिंदे यांच्या सूचनेनंतर परिवहन मंत्री प्रताप सरनाईक यांनी हा निर्णय घेतला.
काय आहे संपुर्ण बातमी? –
एमएसआरटीसीकडून 15 ऑक्टोबर ते 5 नोव्हेंबर या कालावधीत हंगामी भाडेवाढ लागू करण्याची घोषणा झाली होती. दिवाळीच्या काळात मोठ्या प्रमाणात प्रवाशांची गर्दी होत असल्याने महसूल वाढविण्यासाठी हा निर्णय घेण्यात आला होता. मात्र या भाडेवाढीवर सर्वत्र तीव्र नाराजी व्यक्त करण्यात आली. अखेर, दुसऱ्याच दिवशी सरकारकडून हा निर्णय मागे घेण्यात आला आहे.
उपमुख्यमंत्री एकनाथ शिंदेंच्या सूचनेनंतर भाडेवाढ रद्द –
एमएसआरटीसीच्या प्रस्तावित 10 टक्के भाडेवाढच्या निर्णय घेण्यात आला होता. मात्र, उपमुख्यमंत्री एकनाथ शिंदे यांनी केलेल्या सूचनेनंतर ही प्रस्तावित भाडेवाड तात्काळ रद्द करण्यात आली आहे. सध्याची राज्यातील पूर परिस्थिती आणि प्रवाशांवर होणारा अतिरिक्त आर्थिक भार लक्षात घेऊन एकनाथ शिंदे यांनी ही भाडेवाढ थांबवण्याचे निर्देश दिले होते. त्यानंतर, परिवहन मंत्री प्रताप सरनाईक यांनी एसटी प्रशासनाला आदेश देत प्रस्तावित भाडेवाढ रद्द करण्याचा निर्णय घेण्यात आलाय.
