धुळे, 8 डिसेंबर : धुळे जिल्ह्यातील साक्री तालुक्यातुन एक अत्यंत दु:खद घटना समोर आली आहे. कांदे भरलेला एक ट्रॅक्टर ट्रॉलीसह विहिरीत कोसळला. या दुर्घटनेत ट्रॅक्टरवर खेळत असलेली तीन लहान मुलं ट्रॉलीसोबत विहिरीत कोसळल्याची प्राथमिक माहिती समोर आली आहे. धुळे जिल्ह्याच्या साक्री तालुक्यातील गणेशपूर येथे काल रविवारी दुपारच्या सुमारास ही दुर्घटना घडली.
नेमकं काय घडलं –
मिळालेल्या प्राथमिक माहितीनुसार, गणेशपूर शिवारात कांदा चाळीतील कांदा ट्रॅक्टरच्या ट्रॉलीमध्ये भरण्याचे काम सुरु होते. काम करणाऱ्या मजुरांची काही मुले ट्रॅक्टरवर खेळत होते. मात्र, खेळताना अचानकपणे कांद्याने भरलेले हे ट्रॅक्टर सुरू झाले व पाच वर्षापेक्षा कमी वयाच्या चिमुकलींसह काही अंतरावर असलेल्या विना कठड्याच्या अंदाजे 60 फूट खोल पाण्याने तुडुंब भरलेल्या विहिरीत कोसळले. यामध्ये परी संदीप गायकवाड या दोन वर्षीय चिमुकलीला वाचवण्यात गावकऱ्यांना यश आले.
मात्र, खुशी दाजू ठाकरे (वय 3 वर्ष), ऋतिका संदीप गायकवाड (3 वर्ष) या दोन बालिका खोल विहिरीत पडल्याने पाण्यात बेपत्ता झाले. बेपत्ता बालिकांचा शोध घेण्यासाठी 60 फुटापर्यंत असलेले पाणी पंपाच्या सहाय्याने उपसण्याचे काम उशिरापर्यंत सुरू होते. मदत कार्यासाठी घटनास्थळी जेसीबी मागवण्यात आले आहे.
या घटनेची माहिती मिळताच साक्री पोलीस ठाण्याचे पोलीस निरीक्षक दीपक वळवी व त्यांचे पथक घटनास्थळी तत्काळ दाखल झाले. यानंतर गावकऱ्यांच्या मदतीने पोलीस प्रशासनाकडून बेपत्ता बालिकांचा शोध घेण्याचे काम युद्ध पातळीवर सुरू आहे. तर ट्रॅक्टरसोबत पाण्यात गेलेल्या बालिकांचा अद्याप शोध न लागल्याने हळहळ व्यक्त होत आहे.
