जुन्नर (पुणे), 19 फेब्रुवारी: देशभरात आज 19 फेब्रुवारी रोजी छत्रपती शिवाजी महाराजांच्या जयंतीचा उत्साह पाहायला मिळत असून राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे तसेच सुनेत्रा पवार हे शिवजयंतीनिमित्त किल्ले शिवनेरीवर दाखल झाले आहेत.
दरम्यान, शिवजयंतीच्या निमित्ताने शिवजन्म स्थान किल्ले शिवनेरीवर आकर्षक अशी सजावट करण्यात आली आहे. शिव जयंतीच्या पूर्वसंध्येला किल्ले शिवनेरीवरील शिव जन्मस्थळ व शिवकुंज इमारतीला आकर्षक अशा रंगी बेरंगी फुलांनी सजविण्यात आले आहे.
शिवजन्मोत्सव सोहळा 2026 –
किल्ले शिवनेरीवरील शिवजन्म स्थळाच्या आतील भागातही आकर्षक सजावट करण्यात आली आहे. छत्रपती शिवाजी महाराज जन्मोत्सव सोहळ्याला राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार, सांस्कृतिक मंत्री आशिष शेलार यांच्यासह प्रशासनातील अधिकारी उपस्थित असून शिवजन्मोत्सव सोहळा मोठ्या उत्साहात साजरा करण्यात येत आहे.
शिवभक्त किल्ले शिवनेरीवर दाखल –
महाराष्ट्राचेच नव्हे तर संपूर्ण भारताचे आराध्यदैवत असलेले छत्रपती शिवाजी महाराज यांची आज 396 वी जयंती आहे. त्यानिमित्त किल्ले शिवनेरीवर हिंदवी स्वराज्य महोत्सव साजरा करण्यात येत आहे. छत्रपती शिवाजी महाराज यांच्या जयंती निमित्त जन्मस्थळावर नतमस्तक होण्यासाठी राज्यातील विविध भागातून अनेक शिवभक्त किल्ले शिवनेरीवर दाखल झाले होते.
