जळगाव, 5 मार्च: जळगाव लोकसभेचे माजी खासदार तथा ठाकरेंच्या शिवसेनेचे नेते उन्मेश पाटील यांचा शिंदेंच्या शिवसेनेत पक्षप्रवेश होणार असल्याच्या चर्चा सुरू होत्या. मात्र, या चर्चांवर अखेर आता स्पष्ठता आली असून उद्या 6 मार्च रोजी उन्मेश पाटील आणि त्यांचे काही समर्थकांसह शिंदेंच्या शिवसेनेत प्रवेश करणार आहेत. याबाबतची माहिती उन्मेश पाटील यांच्या समाजमाध्यमावरील अकाऊंटवरून देण्यात आली आहे.
उद्या मुंबईत पक्षप्रवेश –
जळगाव जिल्ह्यातील काही आजी-माजी जिल्हा पदाधिकारी, तालुका स्तरावरील पदाधिकारी तसेच मोठ्या संख्येने कार्यकर्त्यांकडून उन्मेश पाटील यांच्या निर्णयाला पाठिंबा देणार असल्याची शक्यता व्यक्त केली जात आहे. या पार्श्वभूमीवर उद्या शुक्रवारी 6 मार्च रोजी मुंबईत होणाऱ्या या प्रवेश सोहळ्यात उन्मेश पाटील यांच्यासह जळगाव जिल्ह्याच्या राजकारणातील नेमकं कोण-कोणं पक्षप्रवेश करणार याकडे सर्वांचं लक्ष लागलंय.
लोकसभा निवडणुकीत ठाकरेंच्या शिवसेनेत केला होता पक्षप्रवेश –
माजी खासदार उन्मेश पाटील यांनी 2014 ते 2019 च्या काळात चाळीसगाव विधानसभा मतदारसंघाचं प्रतिनिधित्व केलं. यानंतर त्यांना लोकसभेची उमेदवारी देण्यात आली होती. दरम्यान, 2019 साली ते पहिल्यांदाच जळगाव लोकसभा मतदारसंघातून खासदार म्हणून विजयी झाले. यानंतर 2024 साली पुन्हा एकदा उमेदवारी मिळण्यासाठी ते इच्छुक असताना त्यांना भाजपकडून उमेदवारी नाकारण्यात आली. उन्मेश पाटील यांच्याऐवजी 2019 साली स्मिता वाघ यांना भाजपकडून उमेदवारी देण्यात आली.
भाजपकडून उमेदवारी नाकारण्यात आल्यानंतर पारोळ्याचे माजी नगराध्यक्ष करण पवार यांच्यासह उन्मेश पाटील यांनी शिवसेना उद्धव बाळासाहेब ठाकरे पक्षात प्रवेश केला. 2024 च्या लोकसभा निवडणुकीत त्यांनी करण पाटील-पवार यांना जळगाव लोकसभा मतदारसंघाची उमेदवारी मिळवून दिली होती. मात्र, स्मिता वाघ यांनी करण पवार यांचा मोठ्या मताधिक्याने पराभव केला.
यानंतर उन्मेश पाटील हे सत्ताधाऱ्यांवर विविध आरोप करत जळगाव जिल्ह्याच्या राजकारणात सातत्याने चर्चेत राहिले. दरम्यान, मागील काही महिन्यांपुर्वी पार पडलेल्या नगरपरिषद निवडणूक तसेच महापालिका निवडणुकीत ठाकरेंच्या शिवसेनेला अपेक्षित असे यश मिळावता आले नाही. असे असताना त्यांनी ठाकरेंची शिवसेना सोडत शिंदेंच्या शिवसेनेत जाण्याचा निर्णय घेतला असून उद्या त्यांचा पक्षप्रवेश पार पडणार आहे.
