ईसा तडवी, प्रतिनिधी
पाचोरा, 16 मार्च: पाचोरा शहरात घडलेल्या मोटारसायकल चोरीच्या घटनेचा पाचोरा पोलिसांनी अवघ्या चार तासांत छडा लावत आरोपीला ताब्यात घेत चोरीस गेलेली दुचाकी हस्तगत केली. विशेष म्हणजे या प्रकरणाचे दोषारोपपत्रही अवघ्या 12 तासांच्या आत पाचोरा न्यायालयात दाखल करण्यात आले आहे.
काय आहे संपुर्ण बातमी? –
मिळालेल्या माहितीनुसार, फिर्यादी प्रशांत शंकर वाघ (वय 42, रा. सातगाव डोंगरी, ता. पाचोरा) यांनी १० मार्च २०२६ रोजी सायंकाळी सुमारे ८.३७ वाजता जामनेर रोडवरील राधाकृष्ण पेट्रोलपंप येथे त्यांची हिरो कंपनीची फॅशन प्रो (क्र. MH-19 BR-4211) ही लाल रंगाची मोटारसायकल उभी केली होती. काही वेळातच अज्ञात इसमाने सदर मोटारसायकल चोरी केल्याचे उघड झाले. याप्रकरणी तुषार लक्ष्मण आघाडे (वय २७, रा. सातगाव डोंगरी, ता. पाचोरा) याच्याविरुद्ध पाचोरा पोलीस ठाण्यात गुन्हा रजिस्टर क्रमांक ११९/२०२६, भारतीय न्याय संहिता २०२३ कलम ३०३(२) अन्वये १४ मार्च २०२६ रोजी गुन्हा दाखल करण्यात आला.
गुन्ह्याचा तपास सुरू असताना पाचोरा पोलीस ठाण्याच्या गुन्हे प्रकटीकरण शाखेतील पोहेकॉ राहुल काशिनाथ शिंपी व पोलीस कॉन्स्टेबल शरद मांगो पाटील यांना गुप्त बातमीदारामार्फत माहिती मिळाली की, भारत डेअरी बसस्टॉप परिसरात एक इसम मोटारसायकलसह संशयास्पदरीत्या फिरताना दिसत आहे. मिळालेल्या माहितीनुसार पोलिसांनी तत्काळ त्या ठिकाणी धाव घेत संशयितास ताब्यात घेतले. त्याच्याकडून चौकशी केली असता चोरीस गेलेली मोटारसायकल आढळून आली.
पोलिसांनी 12 तासांच्या आत दाखल केलं गुन्ह्याचे दोषारोपपत्र –
पोलिसी चौकशीत संशयिताने आपले नाव तुषार लक्ष्मण आघाडे (रा. सातगाव डोंगरी) असे सांगत गुन्ह्याची कबुली दिली. त्यानंतर पंचासमक्ष आरोपीकडून सुमारे १५ हजार रुपये किमतीची हिरो फॅशन प्रो मोटारसायकल जप्त करण्यात आली. या प्रकरणाचा तपास पोहेकॉ राहुल काशिनाथ शिंपी यांनी पूर्ण करून अवघ्या 12 तासांच्या आत गुन्ह्याचे दोषारोपपत्र पाचोरा न्यायालयात दाखल केले.
ही कारवाई पोलीस अधीक्षक महेश्वर रेड्डी, अप्पर पोलीस अधीक्षक (चाळीसगाव परिमंडळ) कविता नेरकर व उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार, पोहेकॉ राहुल काशिनाथ शिंपी आणि पोलीस कॉन्स्टेबल शरद मांगो पाटील यांनी यशस्वीपणे पार पाडली.
