नवी दिल्ली, 6 एप्रिल: राज्यसभेत महाराष्ट्रासह देशभरातील 19 नवनिर्वाचित खासदारांनी आज 6 एप्रिल रोजी शपथ घेतली. राज्यसभा अध्यक्ष सी.पी. राधाकृष्णन यांनी या सदस्यांना शपथ दिली. महाराष्ट्रात राज्यसभेच्या 7 जागांसाठी झालेल्या निवडणुकीत सर्व उमेदवार बिनविरोध निवडून आले. यामध्ये महायुती आघाडीचे 6 आणि महाविकास आघाडीचा 1 उमेदवार विजयी झाला.
राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार आणि केंद्रीय मंत्री तसेच रिपब्लिकन पार्टी ऑफ इंडिया (आठवले गट) चे अध्यक्ष रामदास आठवले यांनी सलग तिसऱ्यांदा राज्यसभेत प्रवेश केला. महाविकास आघाडीकडून शरद पवार यांची निवड झाली, तर भाजपकडून रामदास आठवले, विनोद तावडे, रामराव वडकुते आणि माया इवनाते बिनविरोध निवडून आले.
शिवसेना (एकनाथ शिंदे गट) कडून ज्योती वाघमारे यांची, तर राष्ट्रवादी काँग्रेस (अजित पवार गट) कडून पार्थ पवार यांची निवड झाली. दरम्यान, देशातील १० राज्यांमधील ३७ जागांसाठी १६ मार्च रोजी मतदान पार पडले होते आणि त्याच दिवशी मतमोजणीही झाली. महाराष्ट्रासह ओडिशा, तामिळनाडू, पश्चिम बंगाल, आसाम, बिहार, छत्तीसगड, हरियाणा, हिमाचल प्रदेश आणि तेलंगणा या राज्यांतील 37 सदस्यांचा कार्यकाळ एप्रिलमध्ये संपत असल्याने या जागांसाठी निवडणूक घेण्यात आली होती.
हेही वाचा: मिशन लक्ष्यवेध योजनेअंतर्गत जळगावमध्ये ‘या’ चार क्रीडा प्रकारांसाठी खेळाडू निवड प्रक्रिया
