पाचोरा, 28 एप्रिल: गौ सन्मान अभियानांतर्गत ‘गौमाते’ची सेवा, संरक्षण आणि सन्मान यांचे महत्त्व अधोरेखित करण्यासाठी देशभरात विविध उपक्रम राबविण्यात येत असून, तालुकास्तरावर गौ सन्मान यात्रांचे आयोजन करण्यात येत आहे. याच पार्श्वभूमीवर जळगाव जिल्ह्यातील पाचोरा शहरात दि. २७ एप्रिल रोजी सकल हिंदू समाजाच्या वतीने गौ सन्मान यात्रा काढण्यात आली.
पाचोरा शहरातील श्रीराम मंदिर येथून मोठ्या उत्साहात यात्रेला प्रारंभ झाला. भगवे ध्वज, घोषणाबाजी आणि भजन-कीर्तनाच्या वातावरणात ही यात्रा छत्रपती शिवाजी महाराज चौक मार्गे तहसील कार्यालयावर पोहोचली. यावेळी सकल हिंदू समाजाच्या वतीने प्रशासनाला निवेदन सादर करण्यात आले.
या निवेदनात गौमातेच्या संवर्धनासाठी विशेष संशोधनाला प्रोत्साहन देणे, गोशाळांना आर्थिक अनुदान वाढविणे, देशभरात गोहत्या पूर्णपणे बंद करणे तसेच ‘गौमातेला’ ‘राष्ट्रमाता’ म्हणून अधिकृत दर्जा देणे, अशा प्रमुख मागण्या करण्यात आल्या. यात्रेदरम्यान विविध वक्त्यांनी गौसंवर्धनाचे धार्मिक, सांस्कृतिक आणि आर्थिक महत्त्व स्पष्ट केले.
या गौ सन्मान यात्रेत पुरुष, महिला, युवक, संत-महंत तसेच सकल हिंदू समाज मोठ्या संख्येने सहभागी झाला होता. शिस्तबद्ध पद्धतीने पार पडलेल्या या यात्रेमुळे शहरात धार्मिक व सामाजिक ऐक्याचे वातावरण निर्माण झाले होते.
हेही वाचा: रेशीम शेतीसारख्या पर्यायी उद्योगातून शेतकरी ‘लखपती’ होऊ शकतो – पालकमंत्री गुलाबराव पाटील
