ईसा तडवी, प्रतिनिधी
पिंपळगाव हरेश्वर, 12 जून: जळगाव जिल्ह्याचे जिल्हाधिकारी रोहन घुगे यांनी प्रांताधिकारी भूषण अहिरे व तहसीलदार विजयकुमार बनसोडे यांच्यासह पिंपळगाव हरेश्वर येथील प्रसिद्ध श्री हरिहरेश्वर मंदिराला भेट देऊन दर्शन घेतले. यावेळी मंदिर परिसरातील विकासकामे, भाविकांसाठी आवश्यक सुविधा तसेच संस्थानसमोरील विविध मूलभूत समस्यांचा आढावा घेण्यात आला.
मंदिरात आगमनानंतर जिल्हाधिकारी रोहन घुगे व अन्य अधिकाऱ्यांचे मंदिर संस्थानच्या वतीने स्वागत व सत्कार करण्यात आला. त्यानंतर आयोजित बैठकीत मंदिर परिसराचा सर्वांगीण विकास, भाविकांसाठी आवश्यक सुविधा, वाहतूक व पायाभूत सुविधांशी संबंधित प्रश्न तसेच संस्थानच्या विविध मागण्यांबाबत सविस्तर चर्चा करण्यात आली. उपस्थित पदाधिकाऱ्यांनी मंदिराच्या विकासासाठी आवश्यक असलेल्या विविध बाबी प्रशासनाच्या निदर्शनास आणून दिल्या.
याप्रसंगी कृषी उत्पन्न बाजार समितीचे संचालक शालिग्राम मालकर, माजी जिल्हा परिषद सदस्य मधुकर काटे, सरपंच सुनंदा क्षीरसागर, मंदिर संस्थानचे अध्यक्ष संतोष गोरे, उपाध्यक्ष ईश्वर पाटील, सचिव पंडित तेली, ग्रामपंचायत उपसरपंच राहुल बडगुजर, माजी उपसरपंच कैलास आप्पा क्षीरसागर आदी मान्यवर उपस्थित होते.
तसेच कोमल आबा देशमुख, नाना भाऊ सरकार, अजय तेली, विनोद महाजन, पप्पू सूर्यवंशी, राजू भाऊ महाजन, पांडू भाऊ तेली, अशोक वाघे, तोताराम मेटे, राजधर मेटे, बापू पाटील, कडुबा गोसावी यांच्यासह ग्रामपंचायत सदस्य, मंदिर संस्थानचे पदाधिकारी, महसूल विभागाचे अधिकारी-कर्मचारी, तलाठी तसेच ग्रामस्थ मोठ्या संख्येने उपस्थित होते.
जिल्हाधिकाऱ्यांच्या या भेटीमुळे श्री हरिहरेश्वर मंदिर परिसराच्या विकासाला चालना मिळण्याबरोबरच अनेक प्रलंबित प्रश्न मार्गी लागतील, अशी अपेक्षा ग्रामस्थ व मंदिर संस्थानच्या पदाधिकाऱ्यांकडून व्यक्त करण्यात येत आहे.
