अमळनेर, 3 सप्टेंबर : जळगाव जिल्ह्यात जसं बोगस खते आणि बोगस बियाणे निघाले त्याच पद्धतीने आपले सरकार सुद्धा बोगस आहे. या सरकारला शेतकरी, युवा, महिला तसेच रोजगाराबद्दल काहीही घेणे देणे नाही, अशी जोरदार टीका राष्ट्रवादी काँग्रेसचे आमदार रोहित पवार यांनी केली. ते अमळनेर येथे कार्यकर्त्यांच्या मेळाव्यात बोलत होते.
आमदार रोहित पवारांनी कॅबिनेट मंत्री अनिल पाटील यांच्यावर देखील जोरदार टीका केली. ते म्हणाले की, विरोधात असताना मंत्री अनिल पाटील यांनी विधानभवनात कापासासाठी आंदोलन केले. आता सत्तेसाठी सर्व सामान्य लोकांचे प्रश्न हे विसरले. अशा या नेत्याने मंत्री झाल्यावर ज्या भूमीचे दर्शन घेतले, त्याच भूमीतील नागरिक-लोकं तसेच मतदार हे मंत्री अनिल पाटील यांना 2024 मध्ये त्यांची जागा दाखवतील.
शरद पवार यांनी अध्यक्ष पदाचा राजीनामा दिल्यानंतर टीव्हीवर बातमी यावी म्हणून मंत्री अनिल भाईदास पाटील यांनी आमदारकीचा राजीनामा दिला होता. गोष्टीमध्ये टीव्हीवर येण्यासाठी आमदार अनिल पाटील यांची मोठी धडपड असते, अशी टीकाही आमदार रोहित पवार यांनी केली.
आमदार रोहित पवार पुढे म्हणाले की, आता तर टिव्हीवर भाजप नेत्यांचे भाषण सुरू असेल तर कुणी पाहत नाही. त्यापेक्षा साऊथ इंडियन पिक्चर सर्वजण पाहतात. लोक भाजप नेत्यांच्या भाषणापेक्षा मनोरंजनासाठी साऊथ इंडियन पिक्चर पाहणे पसंत करतात. जळगाव जिल्ह्याच्या दौऱ्यावर असलेले राष्ट्रवादीचे आमदार रोहित पवार यांनी आज अमळनेर येथे राष्ट्रवादी महिला, पुरुष तसेच युवक अशा सर्व पदाधिकारी कार्यकर्ते यांचा मेळावा घेतला. जिल्हाभरातून या मेळाव्याला राष्ट्रवादी काँग्रेसचे पदाधिकारी कार्यकर्ते उपस्थित होते.
