चाळीसगाव, 22 ऑगस्ट: शहरातील जय हिंद माध्यमिक व उच्च माध्यमिक विद्यालयात डेंग्यू, चिकुनगुनिया, हत्तीरोग, हिवताप यांसह विविध जलजन्य व कीटकजन्य आजार तसेच कुष्ठरोग आणि एचआयव्ही-एड्सबाबत विद्यार्थ्यांमध्ये जनजागृती करण्यासाठी आरोग्य मार्गदर्शन शिबिराचे आयोजन करण्यात आले. शुक्रवार, 21 ऑगस्ट रोजी हे शिबिर उत्साहात पार पडले.
सहायक संचालक हिवताप, नाशिक डॉ. विवेक खतगावकर, जिल्हा हिवताप अधिकारी डॉ. प्रमोद सोनवणे, वैद्यकीय अधीक्षक डॉ. राजेंद्र चौधरी आणि तालुका आरोग्य अधिकारी डॉ. प्रशांत बोरसे यांच्या आदेशानुसार तसेच चाळीसगाव नगरपरिषदेचे मुख्याधिकारी श्री. बांगर आणि हिवताप पर्यवेक्षक किरण बेलदार यांच्या मार्गदर्शनाखाली या शिबिराचे आयोजन करण्यात आले.
यावेळी ग्रामीण रुग्णालय, चाळीसगाव येथील समुपदेशक नामदेव अहिरे, एलएसओ सचिन महाले, आरोग्य सेवक दीपक ठाकरे, चेतन गुढेकर यांच्यासह आरोग्य कर्मचाऱ्यांनी विद्यार्थ्यांना विविध आजारांबाबत मार्गदर्शन केले. डेंग्यू, चिकुनगुनिया, हत्तीरोग आणि हिवताप यांसारख्या कीटकजन्य आजारांची लक्षणे, त्यावरील प्रतिबंधात्मक उपाय आणि डासांची उत्पत्ती रोखण्यासाठी घ्यावयाची काळजी याबाबत माहिती देण्यात आली.
तसेच जलजन्य व साथीच्या आजारांपासून बचाव करण्यासाठी स्वच्छ पाणी पिणे, परिसराची स्वच्छता राखणे आणि वैयक्तिक स्वच्छतेचे महत्त्व विद्यार्थ्यांना समजावून सांगण्यात आले. एचआयव्ही-एड्स आणि कुष्ठरोगाबाबत समाजात असलेले गैरसमज दूर करण्याबरोबरच या आजारांबाबत योग्य माहिती व प्रतिबंधात्मक उपायांची माहितीही देण्यात आली.
शिबिराच्या माध्यमातून विद्यार्थ्यांनी आरोग्यविषयक माहिती आत्मसात करून ती आपल्या कुटुंबीयांपर्यंत व परिसरातील नागरिकांपर्यंत पोहोचवावी, असे आवाहन आरोग्य कर्मचाऱ्यांनी केले. विद्यार्थ्यांनीही शिबिराला उत्स्फूर्त प्रतिसाद देत विविध विषयांबाबत माहिती जाणून घेतली. या उपक्रमासाठी विद्यालयाचे प्राचार्य, प्राध्यापकवृंद तसेच शिक्षकेतर कर्मचाऱ्यांचे सहकार्य लाभले. आरोग्य विभागाच्या या जनजागृतीपर उपक्रमाचे विद्यार्थ्यांसह उपस्थितांनी कौतुक केले.
