मुंबई, 7 ऑक्टोबर: महाराष्ट्र राज्यात दुष्काळाची परिस्थिती जाहीर झाल्याच्या पार्श्वभूमीवर संकटग्रस्त नागरिकांच्या पाठीशी उभे राहण्याची सामाजिक बांधिलकी म्हणून जळगाव शहर विधानसभा मतदारसंघाचे आमदार सुरेश दामु भोळे (राजूमामा) यांच्या वतीने मुख्यमंत्री सहायता निधीसाठी २ लाख रुपयांचा धनादेश काल 7 ऑक्टोबर रोजी मुख्यमंत्री देवेंद्र फडणवीस यांच्याकडे सुपूर्द करण्यात आला.
राज्यातील दुष्काळग्रस्त परिस्थितीमुळे शेतकरी, शेतमजूर आणि ग्रामीण भागातील अनेक कुटुंबांसमोर आर्थिक व सामाजिक अडचणी निर्माण होत आहेत. अशा परिस्थितीत शासनाच्या विविध मदत योजनांसोबतच समाजातील सक्षम घटकांनीही आपल्या परीने मदतीचा हात पुढे करणे आवश्यक आहे, या भावनेतून मुख्यमंत्री सहायता निधीसाठी हा निधी देण्यात आला.
आमदार राजूमामा भोळे म्हणाले, “दुष्काळ ही केवळ शासनाची जबाबदारी नसून अशा कठीण काळात समाजातील प्रत्येक सक्षम घटकाने आपली सामाजिक बांधिलकी जपणे गरजेचे आहे. आपल्या क्षमतेनुसार केलेली मदत एखाद्या गरजू कुटुंबासाठी मोठा आधार ठरू शकते.”
सक्षम नागरिकांनी सामाजिक बांधिलकीतून पुढे यावे –
जळगावसह महाराष्ट्रातील उद्योजक, व्यापारी, दानशूर नागरिक, सामाजिक व सेवाभावी संस्था तसेच विविध क्षेत्रातील सक्षम व्यक्तींनी मुख्यमंत्री सहायता निधीमध्ये आपल्या क्षमतेनुसार योगदान देऊन या मदतीच्या कार्यात सहभागी व्हावे, असे आवाहन आमदार राजूमामा भोळे यांनी केले.
“आज आपण दिलेला मदतीचा हात उद्या एखाद्या कुटुंबाला संकटातून सावरण्याचे बळ देऊ शकतो. दुष्काळाच्या या कठीण काळात ‘मी समाजासाठी काय करू शकतो?’ या भावनेतून प्रत्येकाने पुढे येण्याची गरज आहे,” असे त्यांनी सांगितले.
दुष्काळामुळे निर्माण झालेल्या परिस्थितीचा सामना करण्यासाठी शासनाकडून विविध उपाययोजना करण्यात येत असताना समाजातील दानशूर व सक्षम घटकांनीही आपापल्या परीने योगदान दिल्यास मदतीचा हा प्रयत्न अधिक व्यापक होऊ शकतो.
संकटाच्या काळात शासनाचा हात आणि समाजाची साथ एकत्र आली, तर अनेक कुटुंबांना मोठा आधार मिळू शकतो. याच भावनेतून मुख्यमंत्री सहायता निधीसाठी २ लाख रुपयांचा निधी देण्यात आला असून, इतरांनीही या सामाजिक उपक्रमात सहभागी व्हावे, असे आवाहन आमदार राजूमामा भोळे यांनी केले.
हेही वाचा: आदिवासी महिलांना उद्योजकतेची दिशा! सेवा संकल्प अभियानाअंतर्गत पार पडला महिला बचत गटांचा मेळावा
