मुंबई, 28 ऑक्टोबर: राज्यात दुष्काळामुळे पिकांचे 33 टक्क्यांपेक्षा अधिक नुकसान झालेल्या पात्र शेतकऱ्यांना प्रत्येकी 5 हजार रुपयांची अग्रीम मदत देण्याच्या निर्णयाला राज्य मंत्रिमंडळाने मंजुरी दिली आहे. मुख्यमंत्री देवेंद्र फडणवीस यांच्या नेतृत्वाखाली मंगळवारी झालेल्या मंत्रिमंडळ बैठकीत यासंदर्भात निर्णय घेण्यात आला. दिवाळीच्या पार्श्वभूमीवर शेतकऱ्यांना आर्थिक मदत देण्याच्या या निर्णयामुळे संकटात सापडलेल्या पात्र शेतकऱ्यांना दिलासा मिळण्याची अपेक्षा आहे.
मुख्यमंत्री देवेंद्र फडणवीस यांनी दिलेल्या माहितीनुसार, पुढील दोन दिवसांत शेतकऱ्यांच्या बँक खात्यांत मदतीची रक्कम जमा करण्याची प्रक्रिया सुरू होणार आहे. राज्यातील सुमारे 1.5 कोटी शेतकऱ्यांपर्यंत एकूण 7,500 कोटी रुपयांची मदत पोहोचविण्याचे नियोजन करण्यात आले आहे. यापूर्वी मुख्यमंत्र्यांनी गेल्या महिन्यात शेतकऱ्यांना आर्थिक मदत देण्याची घोषणा केली होती. आता मंत्रिमंडळाच्या मंजुरीनंतर प्रत्यक्ष वितरणाच्या प्रक्रियेकडे शेतकऱ्यांचे लक्ष लागले आहे.
View this post on Instagram
304 तालुक्यांतील पात्र शेतकऱ्यांना लाभ –
मदत व पुनर्वसन विभागाच्या माहितीनुसार, राज्यातील 304 दुष्काळग्रस्त तालुक्यांमध्ये पिकांचे 33 टक्क्यांपेक्षा अधिक नुकसान झालेल्या पात्र शेतकऱ्यांना ही अग्रीम मदत दिली जाणार आहे. थेट लाभ हस्तांतरण (डीबीटी) पद्धतीने ही रक्कम शेतकऱ्यांच्या बँक खात्यांत जमा करण्यात येणार आहे. ज्या शेतकऱ्यांकडे फार्मर आयडी उपलब्ध आहे, त्यांच्या खात्यावर थेट 5 हजार रुपये जमा करण्याचे नियोजन आहे. फार्मर आयडी नसलेल्या शेतकऱ्यांची आवश्यक माहिती आणि केवायसी तपासून पात्रतेनुसार मदत देण्यात येणार असल्याचे सांगण्यात आले आहे.
View this post on Instagram
कर्जाच्या वसुलीसाठी रक्कम कापण्यास मनाई –
शासकीय मदत खात्यात जमा झाल्यानंतर बँका जुन्या कर्जाच्या थकबाकीपोटी ही रक्कम कापून घेतील, अशी भीती शेतकऱ्यांकडून व्यक्त केली जात होती. या पार्श्वभूमीवर मदतीची रक्कम कर्जाच्या वसुलीसाठी कापली जाऊ नये, असे निर्देश मुख्यमंत्री देवेंद्र फडणवीस यांनी बँकांना देण्याची सूचना संबंधित अधिकाऱ्यांना केली आहे. त्यामुळे मदतीची संपूर्ण रक्कम पात्र शेतकऱ्यांच्या हातात पडणार का, तसेच प्रत्यक्ष वितरणाची प्रक्रिया किती वेगाने पूर्ण होते, याकडे लक्ष लागले आहे.
हेही वाचा: Chopda News: चोपड्यात वेश्याव्यवसायावर पोलिसांचा छापा; एकाला अटक
