मुंबई, 2 डिसेंबर : राज्यात अवकाळी गारपिटीचा फटका बसलेल्या बाधित शेतकऱ्यांना राज्य आपत्ती प्रतिसाद निधीनुसार तीन हेक्टरच्या मर्यादेत जिरायत जमिनीच्या पिकांसाठी हेक्टरी 13,600 रूपये, बागायतीसाठी हेक्टरी 27 हजार रूपये आणि बहुवार्षिक पिकांच्या नुकसान भरपाईसाठी हेक्टरी तब्बल 36 हजार रूपये मदत करण्याचे निर्देश महसूल वन विभागाने परिपत्रकाद्वारे जारी केले आहेत. या निर्णयामुळे बाधित शेतकऱ्यांना मोठा दिलासा मिळणार आहे.
काय आहे संपूर्ण बातमी? –
ऑक्टोबर-नोव्हेंबरमध्ये अवकाळी पाऊस, गारपीट यामुळे शेती आणि फळ पिकांचे मोठ्या प्रमाणात नुकसाने झाले होते. या नुकसानीचा आढावा घेऊन मदत देण्याचा निर्णय राज्य सरकारने नोव्हेंबर महिन्यात घेतला होता. मात्र, निर्णयाची अंमलबजावणी न केल्याने शेतकऱ्यांनी सरकार विरोधात रोष व्यक्त केला होता. अनेक भागात शेतकरी रस्त्यावर उतरले. राज्य सरकारने याची दखल घेत, बाधित शेतकऱ्यांना आपत्ती प्रतिसाद निधीच्या निकषाबाहेर जाऊन तीन हेक्टरच्या मर्यादेत मदत देण्याचे आदेश आता दिले आहेत.
अशी मिळणार मदत –
एसडीआरएफच्या निकषानुसार यापूर्वी 2 हेक्टरच्या मर्यादेत मदत दिली जात होती. महाविकास आघाडी सरकारच्या काळात हे प्रमाण तीन हेक्टरच्या मर्यादेपर्यंत वाढविण्यात आले होते. राज्यात त्यानंतर सत्तेत आलेल्या महायुती सरकारने देखील याच निर्णयाच्या धर्तीवर जिरायती शेतीसाठी 8,500 रूपये ऐवजी 13,500 रूपये, बागायती पिकांसाठी हेक्टरी 17 हजार रूपयांऐवजी 27 हजार रूपये आणि बहुवार्षिक पिकांच्या नुकसान भरपाईसाठी 22,500 रूपयांऐवजी आता 36 हजार रूपयांची मदत देण्यात येणार आहे.
