मुंबई, 16 जुलै : महाराष्ट्रात सध्या महिला आएस अधिकारी डॉ. पूजा खेडकर यांच्या प्रकरणाची मोठ्या प्रमाणात चर्चा सुरू असताना एक मोठी अपडेट समोर आली आहे. पूजा खेडकर यांचा महाराष्ट्रातील प्रशिक्षण कालावधी संपवण्यात आला असून त्यांना मसुरीतील प्रशिक्षण संस्थेत परत बोलावण्यात आले आहे.
जिल्हा प्रशिक्षण कार्यक्रम स्थगित –
वादग्रस्त महिला आयएएस अधिकारी डॉ. पूजा खेडकर यांचा जिल्हा प्रशिक्षण कार्यक्रम स्थगित करण्याचे आदेश महाराष्ट्र शासनाने दिले आहेत. लाल बहादूर शास्त्रीय प्रशासकीय अकादमी यांनी दिलेल्या निर्देशानुसार महाराष्ट्र शासनाने ही कारवाई केल्याची माहिती समोर आली आहे. खेडकर यांना 23 जुलै पूर्वी मसूरी येथील अकॅडमीमध्ये पुन्हा हजर राहण्याचे आदेश यामध्ये देण्यात आले आहेत.
पूजा खेडकर यांची चौकशी सुरू –
खासगी ऑडी गाडीवर लाल दिवा लावणे आणि स्वतंत्र केबिनसाठी आग्रह धरणे यामुळे प्रोबेशनरी आयएस अधिकारी पूजा खेडकर चर्चेत आल्या होत्या. त्यानंतर खेडकर यांच्या शारीरिक अपंगत्व आणि ओबीसी प्रमाणपत्र बोगस असल्याचे देखील समोर आले. याच मुद्द्यांवर पंतप्रधान कार्यालय आणि मसूरी येथील लाल बहादूर शास्त्रीय प्रशासकीय अकादमीने डॉ. पूजा खेडकर यांची चौकशी सुरू केली आहे.
चौकशीचा अहवाल मंत्रालयाला देण्यात येणार –
पूजा खेडकर यांनी बनावट दिव्यांग प्रमाणपत्र वापरून परीक्षा उत्तीर्ण झाल्याचा आरोप त्यांच्यावर करण्यात येत आहे. तसेच त्यांच्याकडे कोट्यवधी रूपयांची संपत्ती असतानाही त्यांनी ओबीसी नॉन क्रिमी लेअर सर्टिफिकेट काढल्याची माहिती समोर आली आहे. आता पूजा खेडकर यांच्या या प्रकरणाची चौकशी केंद्र सरकार करणार आहे. केंद्र सरकारच्या कार्मिक मंत्रालयाने पूजा खेडकर प्रकरणाची चौकशी करण्यासाठी एकसदस्यीय समिती नेमली असून या समितीने आपला तपास सुरू केला आहे. दरम्यान, दोन आठवड्यात त्याचा अहवाल मंत्रालयाला देण्यात येणार असल्याची माहिती समोर आली आहे.
हेही वाचा : Arun Bhatia Interview : ‘देशात भ्रष्टाचार एक धंदा’, Ex IAS अधिकारी अरुण भाटीया यांची स्फोटक मुलाखत
