जळगाव, 30 ऑगस्ट : ठाणे जिल्ह्यातील बदलापूर येथील नामांकित शाळेत जाणाऱ्या दोन अल्पवयीन चिमुरडींवर शाळेतला सफाई कर्मचारी अक्षय शिंदे या नराधमाने लैंगिक अत्याचार केला. या घटनेमुळे संपुर्ण महाराष्ट्रात संतापाची लाट उसळली होती. दरम्यान, या घटनेचा निषेध व्यक्त करत या नराधम आरोपीला कठोरातील कठोर शिक्षा व्हावी, या मागणीसाठी प्रारंभिक आंतरराष्ट्रीय मानवाधिकार एवं महिला अपराध संघटन नियंत्रण नवी दिल्ली (रजि. भारत सरकार) संघटनेचे राष्ट्रीय अध्यक्ष दिलीप मोहिते यांच्या आदेशाने तसेच महाराष्ट्र राज्य अध्यक्ष शशिकांत दुसाने यांच्या मार्गदर्शनाखाली जळगाव जिल्हा संघटनेतील पदाधिकाऱ्यांच्यावतीने जिल्हाधिकारी तसेच जळगाव जिल्हा पोलीस अधीक्षक यांना निवदेन देण्यात आले.
मानावधिकार संघटनेचे निवेदन –
जिल्हाधिकारी आयुष प्रसाद यांनी स्वतः मानवाधिकार संघटनेचे निवदेन स्विकारत शासन स्तरावर सदर मागण्यांचा पाठपुराव करणार असल्याचे सांगितले. तसेच जळगाव जिल्हा पोलीस अधीक्षक कार्यालयाच्यावतीने अप्पर पोलीस अधीक्षक अशोक नखाते यांनी निवदेन स्विकारत संघटनेचे महाराष्ट्र राज्य अध्यक्ष शशिकांत दुसाने यांच्यासह जळगाव जिल्हा संघटनेतील पदाधिकाऱ्यांसोबत संवाद साधला. यावेळी समाजात घडणाऱ्या अत्याचाराच्या घटना संघटनेतील पदाधिकाऱ्यांनी अशोत नखाते यांच्या लक्षात आणून दिल्या. दरम्यान, अशोक नखाते यांनी देखील आपल्या संघटनेच्या मागण्यांचा वरिष्ठ पातळीवर पाठपुरावा करणार असल्याचे सांगितले.
यांची होती उपस्थिती –
यावेळी जळगाव जिल्हा सचिव हरी तेली, जळगाव जिल्हा महिला जनसंपर्क अधिकारी सारिका पाटील, जळगाव जिल्हा महिला संघटक नयना दुसाने, जळगाव जिल्हा महिला संघटक वैशाली बाविस्कर, जळगाव जिल्हा महिला जनसंपर्क अधिकारी सारिका पाटील, भुसावळ तालुका महिला जनसंपर्क अधिकारी सुरेखा तायडे आदी उपस्थित होते.
बदलापूर अत्याचार प्रकरण –
बदलापूरमध्ये एका शाळेत सफाई काम करणाऱ्या कामगाराने दोन चिमुरड्या मुलींचे लैंगिक शोषण केल्याची धक्कादायक घटना घडली. यातील आरोपीला अटक करण्यात आली असून गुन्हा दाखल करण्यास दिरंगाई करणाऱ्या पोलिसांवरही कारवाई करण्यात आली. तसेच शाळा प्रशासनाने माफीनामा जाहीर केला असून मुख्याध्यापकांसह चौघांचे निलंबन करण्यात आले आहे. बदलापुरात चार वर्षांच्या दोन मुलींवर शाळेतच अत्याचार करण्यात आल्याच्या धक्कादायक घटनेमुळे पालकांचा उद्रेक झाल्याचे पाहायला मिळाले. संतप्त नागरिकांनी एकत्र येत शाळेबाहेर आंदोलन सुरू केले. शेकडो पालक रस्त्यावर चिमुकल्यांना न्याय मिळवून देण्यासाठी रस्त्यावर उतरल्याचे पाहायला मिळाले. दरम्यान, या घटनेचा राज्यभरातून विविध सामाजिक-राजकीय संघटनांकडून निषेध नोंदविण्यात आलाय.
हेही वाचा : महाराष्ट्रातील सुप्रसिद्ध कीर्तनकारांचे पाचोरा-भडगाव मतदारसंघात होणार किर्तन, ‘असे’ आहे संपुर्ण नियोजन
