जळगाव, 20 जुलै : जळगाव जिल्ह्यातील पाच गुन्हेगारांवर एमपीडीए अंतर्गत कारवाई करण्यात आल्याची माहिती समोर आली आहे. जळगाव जिल्ह्यातील रावेर व पिंपळगाव हरेश्वर पोलिस ठाणे अंतर्गत असलेल्या गुन्हेगारांवर कारवाई करत चार जणांना एमपीडीए अंतर्गत स्थानबद्ध करण्यात आले आहे. तसेच आदेश जळगाव जिल्हा पोलीस अधीक्षक डॉ. महेश्वर रेड्डी यांनी काल 19 जुलै रोजी दिले.
एकाची ठाणे कारागृहात रवानगी –
तसेच जळगाव तालुक्यातील भोलाणे येथील किरण श्रावण कोळी (वय 28) या आरोपीलाही जिल्हाधिकारी आयुष प्रसाद यांच्या आदेशाने स्थानबध्द करण्यात आले आहे. तसेच त्याची ठाणे कारागृहात रवानगी करण्यात आली आहे. त्याच्या कारवाईबाबत राज्य उत्पादन शुल्क विभागाने प्रस्ताव तयार केला होता.
एमपीडीए अंतर्गत कारवाई –
पाचोरा तालुक्यातील पिंपळगाव पोलिस ठाणे हद्दीतील मनोहर उर्फ मोहन उखडू कोळी (55, रा. लोहारी, ता. पाचोरा) तसेच रावेर पोलीस ठाणे अंतर्गत असलेल्या शेख तोसिफ शेख अफजल (28, रा. रावेर), अयुब बशीर तडवी (55, रा. कुसुंबा, ता. रावेर), मगन मुरलीधर करवले (43, रा. अटवाडे, ता. रावेर) या चौघांना स्थानबद्ध करण्यात आले आहे. दरम्यान, एमपीडीए अंतर्गत कारवाई करण्यात आलेल्या चौघं गुन्हेगारांची मुंबई व ठाणे कारागृहात रवानगी करण्यात आली आहे.
भोलाणे येथील एकाची ठाणे कारागृहात रवानगी –
जळगाव तालुक्यातील भोलाणे येथील किरण श्रावण कोळी याच्याविरुध्द राज्य उत्पादन शुल्क विभागाने , दि. 23 जानेवारी 2022 ते 5 मार्च 2023 दरम्यान पाच कारवाया केल्या आहेत. ‘हातभट्टी’ची दारू पाडणाऱ्या आणि विक्री करणाऱ्या या आरोपीची पाच पैकी दोन गुन्ह्यांत निर्दोष मुक्तता झाली आहे. अन् ती गुन्हे न्यायप्रविष्ठ आहेत. तसेच या आरोपीवर दोनदा प्रतिबंधात्मक कारवाईदेखील करण्यात आली आहे. या आरोपीकडून सातत्याने हातभट्टीची दारू विक्री होत असल्याने आणि कारवाई करूनही आळा बसत नसल्याने राज्य उत्पादन शुल्क विभागाचे अधीक्षक डॉ. व्ही. टी. भुकन यांनी गंभीर दखल घेतली आणि एमपीडीएचा प्रस्ताव जिल्हाधिकाऱ्यांना सादर केला.
दरम्यान, जिल्हाधिकारी आयुष प्रसाद यांनी 18 जुलै रोजी या प्रस्तावाला मंजुरी दिली आहे. राज्य उत्पादन शुल्क विभागाने या आरोपीला ताब्यात घेतले आणि ठाणे कारागृहात त्याची रवानगी केली आहे.
काय आहे हा एमपीडीए कायदा? –
महाराष्ट्र झोपडपट्टी दादा, हातभट्टीवाले, तसेच औषधीद्रव्यविषयक गुन्हेगार व धोकादायक व्यक्तींच्या विघातक कृत्यांना आळा घालण्यासाठी एमपीडीए कायदा करण्यात आला. यामध्ये आरोपीला एका वर्षासाठी तत्काळ स्थानबध्द (तुरूंगवास) करण्यात येते. तसेच याविरोधात केवळ उच्च न्यायालय व मंत्रालयात दाद मागता येते.
हेही वाचा : ‘आता माघार नाही, उद्यापासून उपोषण’, मनोज जरांगेंची पत्रकार परिषदेत घोषणा
